BAKI, AzerVoice
Vatikan Papa Fransiskin dəfn mərasimində ABŞ prezidenti Donald Tramp və Ukrayna prezidenti Vladimir Zelenski ayrı-ayrı yerlərdə əyləşdiriləcək.
AzerVoice xəbər verir ki, Papanın dəfn mərasimində iştirak edəcək 170-dən çox beynəlxalq nümayəndə heyətinin oturacaq yerlərini diqqətlə planlaşdırır.
Vatikanın məlumatına görə, mərasim şənbə günü baş tutacaq və Papa Fransiskin vəsiyyətinə uyğun olaraq sadə şəkildə keçiriləcək. Lakin təşkilatçılar, mərasimin diplomatik qarşıdurmalara çevrilməməsi üçün xüsusi protokol qaydaları tətbiq edirlər.
2005-ci ildə Papa II İohann Paulun dəfnində olduğu kimi, bu dəfə də nümayəndə heyətləri əlifba sırasına uyğun şəkildə oturacaq. Bu səbəblə, fransız əlifbasında "États-Unis" kimi keçən ABŞ prezidenti Tramp, Ukrayna lideri Zelenskidən uzaq, Afrika ölkələri Esvatini və Efiopiya arasında oturacaq.
Zelenski mərasim çərçivəsində Tramp ilə görüşmək istədiyini bildirib. Əgər baş tutarsa, bu, Zelenskinin bu ilin əvvəlindəki Vaşinqton səfərindən sonra Trampla ilk üzbəüz görüşü olacaq. Hələlik bu görüş rəsmi olaraq təsdiqlənməyib.
Mərasimdə Papa Fransiskin doğma ölkəsi Argentina və Vatikanın yerləşdiyi İtaliya nümayəndələri ön sırada əyləşəcək. Argentina prezidenti Xavyer Milei ilə Papanın gərgin münasibətlərinə baxmayaraq, prezident mərasimdə iştirak edəcək.
İtaliya təqribən 70 nəfərlik nümayəndə heyəti ilə ən böyük nümayəndəlik olacaq. Heyətə prezident Sergio Mattarella, baş nazir Giorgia Meloni, Senat və parlamentin rəhbərləri, Konstitusiya Məhkəməsinin və Xarici İşlər Nazirliyinin rəhbərləri daxildir.
Rusiya prezidenti Vladimir Putin və İsrail baş naziri Benyamin Netanyahu barəsində beynəlxalq həbsetmə qərarı olduğu üçün, onlar mərasimə dəvət olunmayıblar. Rusiyanı Mədəniyyət naziri Olqa Lyubimova, İsraili isə Vatikan səfiri Yaron Sideman təmsil edəcək.
Vatikanın protokoluna görə, mərasimə qatılan kişilər tünd kostyum, uzun qara qalstuk və qara nişan, qadınlar isə qara əlcəkli geyim və inci boyunbağı taxmalıdır.
