BAKI, AzerVoice, Orxan Qədirzadə
İndoneziya ABŞ ilə tariflərə dair sazişi 2026-cı ilin yanvarında imzalamağı planlaşdırır. Bu barədə İndoneziyanın iqtisadi məsələlər üzrə əlaqələndirici naziri və danışıqlar üzrə əsas nümayəndəsi Erlanqqa Hartarto açıqlama verib.
AzerVoice-un məlumatına görə, Hartarto bildirib ki, tərəflər “qarşılıqlı ticarət sazişi” çərçivəsində bütün əsas və texniki məsələlər üzrə razılığa gəlib. Onun sözlərinə görə, sazişin hüquqi baxımdan yekunlaşdırılması üçün İndoneziya və ABŞ-ın texniki qrupları yanvarın ikinci həftəsində son redaktə mərhələsinə başlayacaq.
Hartarto Vaşinqtonda ABŞ-ın ticarət nümayəndəsi ilə keçirdiyi görüşdən sonra qeyd edib ki, razılaşma tamamlandıqdan sonra İndoneziya prezidenti Prabovo Subianto ilə ABŞ prezidenti Donald Tramp arasında görüşün təşkili nəzərdə tutulur. Gözləntilərə görə, saziş 2026-cı ilin yanvar ayının sonuna qədər imzalana bilər.
Məlumata əsasən, tərəflər arasında danışıqlar ABŞ-ın İndoneziya ixracına 32 faizlik rüsum tətbiq etmək niyyəti fonunda intensivləşib. İyul ayında əldə olunan çərçivə razılaşmasına əsasən, ABŞ İndoneziyadan idxala tətbiq etdiyi tarifləri 19 faizə endirib.
Eyni zamanda, Cakarta ABŞ ilə ticarət balansını tarazlaşdırmaq məqsədilə ABŞ mənşəli məhsulların 99 faizindən çoxuna tətbiq edilən rüsumları ləğv etməyi və qeyri-tarif maneələrini aradan qaldırmağı öhdəsinə götürüb. İndoneziya, həmçinin ABŞ-dan 15 milyard dollar dəyərində enerji məhsulları və 4,5 milyard dollar həcmində kənd təsərrüfatı məhsulları idxal etməyi planlaşdırır.
Hartarto əlavə edib ki, ABŞ İndoneziyanın əsas ixrac məhsulları olan palma yağı, qəhvə və kakao üçün tarif güzəştləri tətbiq edəcək. Onun sözlərinə görə, bu addım xüsusilə təxminən 5 milyon insanın çalışdığı əmək tutumlu sənaye sahələri üçün müsbət təsir göstərəcək.
Qeyd edək ki, son on il ərzində İndoneziya ABŞ-la ticarətdə sabit profisit qeydə alıb. Cari ilin yanvar–oktyabr aylarında iki ölkə arasında ticarət dövriyyəsi 36,2 milyard dollara yaxın olub, İndoneziyanın müsbət ticarət saldosu isə 14,9 milyard dollar təşkil edib.