BAKI, AzerVoice, Fərid Mikayılov
Mali, Burkina Faso və Niger, Beynəlxalq Cinayət Məhkəməsinin Roma Nizamnaməsindən çıxdıqlarını rəsmən elan ediblər.
AzerVoice xəbər verir ki, üç ölkənin ortaq bəyanatında qeyd olunub ki, məhkəmə “neo-müstəmləkəçilik təzyiq alətinə” çevrilib və ədaləti seçici şəkildə tətbiq edir.
Sənəddə vurğulanıb ki, məhkəmə soyqırımı, müharibə cinayətləri və insanlığa qarşı cinayətlərdə təsirli mühakimə apara bilmir, əksinə böyük dövlətlərin maraqlarını qoruyan bir mexanizmə çevrilib.
Qərarın dərhal qüvvəyə mindiyi açıqlanıb. Həmçinin Mali, Burkina Faso və Niger bundan sonra “öz dəyərlərinə uyğun yerli və regional ədalət mexanizmləri” quracaqlarını bəyan ediblər.
Xatırladaq ki, adıçəkilən üç ölkə bu ilin mart ayında Sahel İttifaqı Cinayət və İnsan Hüquqları Məhkəməsinin yaradılacağını elan etmişdi. Bu təşəbbüs bölgədə beynəlxalq məhkəmələrə alternativ hüquqi institutların formalaşdırılması istiqamətində atılmış mühüm addım hesab olunur.