BAKI, AzerVoice, Səməd Əyyubov

ABŞ prezidenti Donald Tramp bildirib ki, əgər yerli hakimiyyət orqanları ondan xahiş etsələr, cinayətkarlıqla mübarizə aparmaq üçün Amerikanın böyük şəhərlərinə Milli Qvardiya göndərəcək.

AzerVoice xəbər verir ki, bu barədə Tramp video-müraciətində deyib.

“Çikaqoya kömək lazımdır, digər şəhərlərə də kömək lazımdır və biz bunu edəcəyik, çünki Amerikada təhlükəsizliyi bərpa etməyə hazırlaşırıq” - deyə, o qeyd edib.

Dövlət başçısı, bir çox şəhərlərdə cinayətkarlıq səviyyəsinin yüksək olduğunu vurğulayıb və bunun səbəbini yerli hakimiyyətin yürütdüyü yanlış siyasətdə görüb. O, misal üçün, Şimali Karolinanın Şarlott şəhərində 23 yaşlı ukraynalı İrina Zarutskayanın qətl hadisəsini göstərib. Tramp bundan əvvəl bu qətlin məsuliyyətini daha əvvəl məhkum olunmuş amerikalı tərəfindən törədildiyini və məsuliyyətin demokratların üzərində olduğunu bəyan etmişdi.

ABŞ prezidenti qeyd edib ki, ABŞ hakimiyyəti cinayətkarlara ölkə boyu “dağıntı və ölüm yaymağa” imkan verə bilməz və onlara qəti cavab verməlidir.

Daha əvvəl Tramp Çikaqo, Baltimor və Luiziana ştatına qoşun göndərməyi təklif etmişdi. Avqustun 11-də isə o, Vaşinqton polisinin müvəqqəti olaraq federal nəzarətə keçirildiyini və şəhərdə cinayətkarlıqla mübarizə üçün Milli Qvardiyanın yerləşdirildiyini açıqlamışdı.

Məlumat üçün bildirək ki, ABŞ Milli Qvardiyası silahlı qüvvələrin ehtiyat hissəsidir və ölkə daxilində fövqəladə hallarda, məsələn, təbii fəlakətlərin nəticələrinin aradan qaldırılmasında, təxliyələrdə və ya iğtişaşların yatırılmasında cəlb olunur.