BAKI, AzerVoice

ABŞ prezidenti Donald Tramp Oval kabinetdə keçirdiyi 80 dəqiqəlik mətbuat konfransında qalmaqallı bəyanatlarla çıxış edib. O, öz siyasətlərinin avtoritar meyillər daşıdığı barədə ittihamlara cavab verib.

“Çoxları deyir ki, bəlkə də biz diktator istəyirik. Mən diktatorları sevmirəm, mən diktator deyiləm. Mən sağlam düşüncəyə sahib, ağıllı bir insanam.”-deyə o qeyd edib.

Tramp xüsusi vurğulayıb ki, Vaşinqton küçələrinə Milli Qvardiyanı çıxarmaq qərarı üçün tərif gözlədiyi halda, onu “respublikaçılara hücumda” ittiham edirlər.

Konfrans zamanı Tramp ABŞ bayrağının yandırılmasını qadağan edən yeni sərəncam imzalayıb.

“Əgər bayrağı yandırsanız, 1 il həbs cəzası alacaqsınız, vaxtından əvvəl azad olunma da olmayacaq.”-deyə o əlavə edib.

Qeyd edək ki, 1989-cu ildə Ali Məhkəmə bayraq yandırma aktını söz azadlığının bir forması kimi tanımışdı.

“Müdafiə Nazirliyi” yox, “Müharibə Nazirliyi”

Tramp çıxışı zamanı ABŞ Müdafiə Nazirliyinin adının dəyişdirilərək tarixi ad olan “Müharibə Nazirliyi” (1789–1949-cu illərdə mövcud) kimi bərpa ediləcəyini açıqlayıb.Onun sözlərinə görə, bu addım üçün Konqresin səsverməsinə ehtiyac yoxdur.

“‘Müdafiə’ adı çox müdafiə xarakterlidir. Biz həm də hücum mövqeyində olmaq istəyirik.”-deyə o bildirib.