BAKI, AzerVoice, Səməd Əyyubov

ABŞ Ukraynaya veriləcək təhlükəsizlik zəmanətləri çərçivəsində bu ölkənin ərazisinə hərbi qüvvə göndərməyəcək.

AzerVoice xəbər verir ki, bu barədə Ağ Evin mətbuat katibi Kerolayn Livitt açıqlama verib.

“Amerika qoşunları Ukraynada yerləşdirilməyəcək. Lakin biz koordinasiya prosesinə dəstək göstərəcəyik və Avropadakı müttəfiqlərimizə təhlükəsizlik təminatı üçün başqa vasitələr təqdim edə bilərik”, – deyə Livitt bildirib.

Daha əvvəl ABŞ prezidenti Donald Tramp “Fox News” telekanalına müsahibəsində də bəyan etmişdi ki, onun rəhbərliyi dövründə Amerika hərbi qüvvələri Ukrayna ərazisinə göndərilməyəcək.

Xatırladaq ki, avqustun 18-də Ağ Evdə Donald Tramp, Volodimir Zelenski, Finlandiya prezidenti Aleksander Stubb, Fransa prezidenti Emmanuel Makron, Böyük Britaniya baş naziri Kir Starmer, Almaniya kansleri Fridrix Mers, İtaliya baş naziri Corcia Meloni, Avropa Komissiyasının rəhbəri Ursula fon der Lyayen və NATO baş katibi Mark Rütte arasında görüş keçirilib. ABŞ lideri bunun ilk dəfə belə geniş tərkibdə təşkil olunduğunu və mövzunun əhəmiyyətini göstərdiyini vurğulayıb.