BAKI, AzerVoice, Səməd Əyyubov

ABŞ-ın vitse-prezidenti Cey Di Vens, dövlət katibi Marko Rubio və prezidentin xüsusi elçisi Stiven Uitkoff Rusiya və Ukrayna ilə əlaqələri koordinasiya edəcək və yaxın zamanda Rusiya prezidenti Vladimir Putinlə Ukrayna prezidenti Volodimir Zelenskinin görüşünün təşkilinə çalışacaqlar.

AzerVoice xəbər verir ki, bu barədə Ağ Evin mətbuat katibi Kerolayn Livitt jurnalistlər üçün keçirilən brifinqdə məlumat verib.

“Prezident Tramp prezident Putinlə telefon danışığında sülh prosesinin növbəti mərhələsinə – prezident Putin və prezident Zelenskinin görüşünə razılıq verib. Zərurət yaranarsa, bu görüşdən sonra Trampın iştirakı ilə üçtərəfli formatda danışıqlar da keçirilə bilər”, – deyə Livitt bildirib.

Onun sözlərinə görə, vitse-prezident Vens, dövlət katibi Rubio və xüsusi elçi Uitkoff görüşün baş tutması üçün Moskva və Kiyevlə koordinasiyanı davam etdirəcəklər.

Xatırladaq ki, avqustun 18-də Ağ Evdə Donald Tramp, Volodimir Zelenski, Finlandiya prezidenti Aleksander Stubb, Fransa prezidenti Emmanuel Makron, Böyük Britaniya baş naziri Kir Starmer, Almaniya kansleri Fridrix Mers, İtaliya baş naziri Corcia Meloni, Avropa Komissiyasının rəhbəri Ursula fon der Lyayen və NATO baş katibi Mark Rütte arasında görüş keçirilib. ABŞ lideri bunun ilk dəfə belə geniş tərkibdə təşkil olunduğunu və mövzunun əhəmiyyətini göstərdiyini vurğulayıb.

Görüş zamanı Tramp həmçinin Vladimir Putinlə də telefonla danışıb. Ağ Evin məlumatına görə, tərəflər Putinlə Zelenski arasında mümkün görüşü, eləcə də üçtərəfli danışıqlar imkanlarını müzakirə ediblər. Rusiya prezidentinin köməkçisi Yuri Uşakov isə bildirib ki, Vaşinqton və Moskva Kiyev ilə birbaşa məsləhətləşmələrin davam etdirilməsini dəstəkləyib və onların daha yüksək səviyyədə keçirilməsi variantını nəzərdən keçirib.