BAKI, AzerVoice, Nərmin Ağayeva

NATO-nun baş katibi Mark Rutte bildirib ki, Yaponiya və Avstraliya da daxil olmaqla 30 ölkə Ukrayna üçün təhlükəsizlik zəmanəti çərçivəsi üzərində işləyir və ABŞ da bu təşəbbüsə qoşulmaqda maraqlıdır.

AzerVoice xəbər verir ki, Rutte bu barədə ABŞ prezidenti Donald Tramp, Ukrayna prezidenti Vladimir Zelenski və Avropa liderləri ilə Ağ Evdə keçirilən görüşdən sonra Fox News-a açıqlama verib.

Onun sözlərinə görə, son aylarda təhlükəsizlik təminatları ilə bağlı müzakirələr aparılır və Vaşinqtonun bu prosesdəki rolu yaxın günlərdə dəqiqləşdiriləcək. Rutte Trampın Putinlə dialoqa başladığını və Rusiyaya təzyiq göstərdiyini vurğulayaraq, görüşü “çox uğurlu” adlandırıb.

NATO baş katibi əlavə edib ki, Tramp telefon danışığında Rusiya prezidenti Vladimir Putini Zelenski ilə üçtərəfli görüşdən öncə ikitərəfli görüşə razı salıb. Görüşün keçiriləcəyi yerin isə tərəflər tərəfindən müəyyən olunacağı qeyd edilib.

Rutte Ukraynanın NATO-ya üzvlüyünün hazırkı danışıqların mövzusu olmadığını xatırladaraq, 2024-cü il sammitindən sonra qəbul edilmiş “geri dönməz yol” qərarının qüvvədə qaldığını bildirib. O, hazırda müzakirə edilən məsələnin NATO-ya üzvlük yox, “5-ci maddəyə bənzər” təhlükəsizlik zəmanətləri olduğunu vurğulayıb.

O həmçinin görüşdə Ukraynanın ərazi güzəştlərinin müzakirə edilmədiyini açıqlayıb və yaxın günlərdə liderlərlə onlayn görüş keçirəcəyini, daha sonra isə ABŞ, Rusiya və Ukrayna arasında üçtərəfli görüş üzərində işləyəcəklərini bildirib.

Qeyd edək ki, Ağ Evdə keçirilən görüşdə Tramp və Zelenski ilə yanaşı, Avropa Komissiyasının sədri Ursula fon der Leyen, Fransa prezidenti Emmanuel Makron, Böyük Britaniyanın baş naziri Keir Starmer, Finlandiya prezidenti Aleksander Stubb, İtaliyanın baş naziri Giorgia Meloni və Almaniya kansleri Fridrix Merz də iştirak ediblər. Tramp avqustun 15-də Alyaskada Putinlə görüşsə də, yekun razılaşmanın əldə olunmadığını açıqlamışdı.