BAKI, AzerVoice

ABŞ Prezidenti Donald Trampın sentyabr ayının əvvəlində Çin Xalq Respublikasının sədri Si Cinpin və Rusiya Prezidenti Vladimir Putinlə görüşmək üçün Pekinə dəvət edilə biləcəyi iddia olunub.

AzerVoice xəbər veir ki, bu barədə "The Times" qəzeti məlumat yayıb.

Nəşr yazır ki, ABŞ ilə Çin arasında son zamanlar əldə olunan bir sıra ticarət razılaşmaları Trampın Pekinlə bağlı əvvəlki sərt mövqeyini yenidən nəzərdən keçirməsinə səbəb olub. Bu da onun Çinin paytaxtına mümkün səfəri ilə bağlı ehtimalları gücləndirib.

Görüş sentyabrın 3-də Pekində keçiriləcəyi və İkinci Dünya Müharibəsində qələbənin 80-ci ildönümünə həsr olunan hərbi parad çərçivəsində baş tutacağı ehtimal olunur. Həmin tədbir həmçinin Çin xalqının Yapon ordusuna qarşı müqavimətinin ildönümü kimi qeyd ediləcək. Parad zamanı Çin öz istehsalı olan və ordunun istifadəsində olan hərbi texnikanı nümayiş etdirəcək.

Qeyd edək ki, hazırda nə Tramp, nə də Kreml bu ehtimal olunan üçtərəfli görüşlə bağlı rəsmi təsdiq verməyib. Kreml sözçüsü Dmitri Peskov isə bildirib ki, Putin və Tramp arasında yeni bir telefon danışığı hələlik planlaşdırılmır. Tramp da Putinlə görüşə ümid bəsləyib-bəsləmədiyinə dair konkret cavab verməyib.