BAKI, AzerVoice
NATO böyük geosiyasi çağırışlarla üz-üzədir, xüsusilə də misli görünməmiş sürətlə yenidən qurulan Rusiya tərəfindən.
AzerVoice xəbər verir ki, bu barədə NATO-nun baş katibi Mark Rutte “New York Times” qəzetinə verdiyi müsahibəsində danışıb.
"Rusiya cəmi üç ay ərzində, NATO ölkələrinin ümumilikdə bir ildə istehsal etdiyindən üç dəfə artıq sursat istehsal edir" - deyə, Rutte bildirib.
O əlavə edib ki, Rusiya Ukraynaya qarşı apardığı müharibədə Şimali Koreya, Çin və İranla əməkdaşlıq edir və Çin üçün Tayvan əsas hədəf olaraq qalır. Rutte bu kontekstdə NATO-ya üzv ölkələrin müdafiə xərclərini hazırda ÜDM-in 2 faizi səviyyəsində olan göstəricidən daha çox artırmalı olduqlarını vurğulayıb.
Qeyd edək ki, keçən ay NATO-ya üzv ölkələrin liderləri ABŞ Prezidenti Donald Trampın tələb etdiyi müdafiə xərclərinin ciddi şəkildə artırılmasını dəstəkləyiblər və Rusiyadan gələn təhlükə qarşısında bir-birlərini müdafiə etmək əzmində birləşdiklərini bildiriblər.
