BAKI,
AzerVoice
İrana heç nə təklif etmədim, hücumlardan sonra danışmadıq.
AzerVoice xəbər verir ki, ABŞ
Prezidenti Donald Tramp İrana qarşı həyata keçirilən hava hücumları
ilə bağlı yeni açıqlama verib.
O, Truth Social platformasında paylaşdığı bəyanatında Tehran
rəhbərliyinə “heç bir təklif etmədiyini” və hücumdan sonra qarşı
tərəflə heç bir əlaqə qurulmadığını bildirib.
ABŞ-ın İranın nüvə obyektlərinə zərbələr endirdiyi bildirilən hava əməliyyatına dair Tramp Demokrat senator Chris Coons-un “hücum uğursuz olub” fikrini rədd edib və nüvə obyektlərinin tamamilə məhv edildiyini iddia edib.
“Obama rejiminin milyonlarla dollar verərək imzaladığı köhnəlmiş JCPOA-dan fərqli olaraq, biz onlara heç nə vermədik, əvəzində nüvə infrastrukturlarını tamamilə sıradan çıxardıq”, – deyə Tramp bildirib.
Mərkəzi Kəşfiyyat İdarəsinin direktoru Con Ratkliffin isə Konqresə təqdim etdiyi hesabatda İranın hava hücumundan müdafiə sistemlərinin məhv edildiyini, nüvə proqramının isə “bərpası çətin olan” şəkildə zədələndiyini bildirdiyi iddia olunub. Ratkliffin fikrincə, bu vəziyyətdə İranın nüvə silahı istehsal etmək qabiliyyəti xeyli zəifləyib və gələcəkdə İsrailin də bu proqramı izləyib qarşısını alma imkanları artıb.
Digər tərəfdən, İranın BMT-dəki daimi nümayəndəsi Əmir Səid İrəvani CBS kanalında çıxış edərək, Tehranın uranın zənginləşdirilməsini dayandırmayacağını açıqlayıb. “Bu, bizim haqqımızdır. Nüvə silahı olmayan ölkələr bu texnologiyadan sülh məqsədilə istifadə edə bilər”, – deyə İrəvani bildirib.
Qeyd edək ki, son hücumların İranın Natanz nüvə obyektinə yönəldiyi və peyk görüntülərində ciddi dağıntılar olduğu bildirilir. ABŞ-İran münasibətləri növbəti dəfə gərgin dövrə qədəm qoyub.
