BAKI, AzerVoice
Rusiya ilə Ukrayna arasında davam edən müharibənin diplomatik həll yolları İstanbul vasitəsilə yenidən gündəmə gəlib.
AzerVoice xəbər verir ki, Mayın 16-da İstanbulda keçirilən danışıqların ilk raundundan sonra, Rusiya ikinci raund üçün də eyni şəhəri təklif edib və iyunun 2-də görüşə hazır olduqlarını açıqlayıb.
Bu arada cəbhədə vəziyyət gərgin olaraq qalır. Ukrayna prezidenti Volodimir Zelenski Rusiyanın Sumı vilayəti yaxınlığında 50 minlik hərbi kontingent yerləşdirdiyini bildirib. Zelenskinin sözlərinə görə, Rusiya Kursk bölgəsindən Ukraynanın şimal-şərqinə doğru irəliləmək və sərhəddə 10 kilometrlik “bufer zona” yaratmaq niyyətindədir.
Washington Post qəzeti Rusiyanın iyun ayında genişmiqyaslı hücuma hazırlaşdığını iddia edib. Məqaləyə görə, əsas hədəf Donetsk vilayətinin tam nəzarətə götürülməsi və Sumı-Xarkov sərhədində strateji bölgələrin tutulmasıdır.
Bununla belə, tərəflər arasında diplomatik ünsiyyət davam edir. Rusiya və Ukrayna arasında 1000 əsirin qarşılıqlı dəyişdirilməsi bu istiqamətdə atılmış mühüm addım kimi qiymətləndirilir. Rusiya xarici işlər naziri Sergey Lavrov rəsmi kanallarla Kiyevə danışıqlar təklifini çatdırdıqlarını və Kiyevin neytral statusuna dair tələblərinin qüvvədə qaldığını bildirib.
ABŞ prezidenti Donald Tramp isə bu məsələyə ehtiyatla yanaşaraq, “Putin müharibəni bitirmək istəyir, ya yox – bunu tezliklə öyrənəcəyik,” - deyə qeyd edib. Lavrov və ABŞ dövlət katibi Marko Rubio arasında telefon danışığı da baş tutub.
Ukrayna lideri isə ABŞ və Rusiya prezidentlərinin iştirakı ilə üçtərəfli görüşə də açıq olduqlarını bəyan edib. ABŞ tərəfi, sülh danışıqlarında irəliləyiş olmayacağı təqdirdə prosesdən çəkilə biləcəklərinə dair xəbərdarlıq edib.
Qeyd edək ki, Rusiya Təhlükəsizlik Şurasının sədr müavini Dmitri Medvedev bu gərginliyin III Dünya Müharibəsinə səbəb ola biləcəyi barədə xəbərdarlıq edib. Rusiya prezidenti Vladimir Putin isə yeni qlobal təhlükəsizlik arxitekturası təklif edərək, bu sistemin bərabər, bölünməz və bütün ölkələrin təhlükəsizlik maraqlarını nəzərə alan formada qurulmalı olduğunu bildirib.