BAKI, AzerVoice
Kremlin sözçüsü Dmitri Peskov, Ukrayna münaqişəsinin həlli istiqamətində göstərdiyi səylərə görə Türkiyəyə minnətdarlıq bildirib. O, Ankaranın həm Rusiya, həm də Ukrayna tərəfindən müsbət qarşılandığını vurğulayıb.
AzerVoice xəbər verir ki, Moskvada jurnalistlərin suallarını cavablandıran Peskov bildirib ki, Rusiya Türkiyənin vasitəçiliyini yüksək qiymətləndirir.
"Türkiyə hər iki tərəfin xoşuna gələn vasitəçidir. Ankara və Türkiyə rəhbərliyinə, müzakirələrin aparılması üçün yaratdığı şəraitə görə minnətdarıq", – deyə Peskov qeyd edib.
O, eyni zamanda, Rusiya Prezidenti Vladimir Putin və ABŞ Prezidenti Donald Trampın Çin səfəri çərçivəsində görüşəcəyi barədə yayılan iddialara da münasibət bildirib. Peskov qeyd edib ki, Putinin sentyabrda Çinə səfəri planlaşdırılır, lakin Tramp ilə görüş üçün hər hansı rəsmi hazırlıq yoxdur.
"Əgər Tramp da həmin dövrdə Çini ziyarət etsə, görüş ehtimalı istisna edilmir, lakin bunun üçün əvvəlcə ekspert səviyyəsində hazırlıqlar aparılmalıdır," – deyə Kremlin sözçüsü əlavə edib.
Peskov həmçinin xatırladıb ki, Rusiya ilə Ukrayna arasında birbaşa danışıqlar daha əvvəl Türkiyənin vasitəçiliyi ilə təşkil olunub. O, Moskvanın danışıqları davam etdirməyə hazır olduğunu və üçüncü mərhələdə onlayn formatda üç işçi qrupun yaradılmasını təklif etdiklərini bildirib. Bu təklifə Ukrayna tərəfindən cavab gözlənilir.
Qeyd edək ki, Rusiya və Ukrayna nümayəndə heyətləri arasında keçirilən danışıqların üçüncü raundu başa çatıb.
Görüş İstanbulda, Çırağan sarayında yerli vaxtla saat 20:27-də (Bakı vaxtı ilə saat 21:37) başlayıb və təxminən 40 dəqiqə davam edib.
Danışıqların yekununa əsasən, tərəflər yalnız hərbi əsirlərlə deyil, həm də mülki şəxslərlə qarşılıqlı mübadilə aparacaqlar.
Həmçinin bildirilib ki, tərəflər arasında danışıqların növbəti raundu keçirilməyəcək.
Ukrayna nümayəndə heyətini Milli Təhlükəsizlik və Müdafiə Şurasının katibi Rüstəm Umerov təmsil edir. Rusiya tərəfinə isə Prezidentin köməkçisi Vladimir Medinski rəhbərlik edir.
Görüş başlamazdan əvvəl Medinski Umerov Çırağan sarayında təkbətək görüş keçiriblər.
Danışıqların yerli vaxtla saat 19:00-da (Bakı vaxtı ilə 20:00-da) başlanması planlaşdırılmışdı. Lakin geniş tərkibli görüş faktiki olaraq təxminən bir saat gec başlayıb.
Qeyd edək ki, iyunun 2-də İstanbulda Rusiya və Ukrayna nümayəndə heyətləri arasında danışıqların 2-ci turu baş tutub. Danışıqlar nəticəsində tərəflər hər tərəfdən 6 min hərbçinin meyitinin qarşı tərəfə təhvil verilməsi ilə bağlı razılığa gəlmişdi.
