BAKI,AzerVoice

2026-cı ildə qeyri neft-qaz sektoru üzrə aksiz vergisi cari ilin proqnozu ilə müqayisədə 125,0 milyon manat və ya 18,4 faiz çox, neft-qaz sektoru üzrə 196,7 milyon manat və ya 20,2 faiz az nəzərdə tutulur.

Neft sektoru üzrə 2025-ci ilin proqnozu ilə müqayisədə azalmaya səbəb Yanacaq Enerji Balansının göstəricilərinə əsasən, Azərbaycan Respublikasında istehsal olunan və daxili istehlaka yönəldilən Aİ-95 markalı avtomobil benzini istehsalının nəzərdə tutulmaması, istehlakın Aİ-92 markalı avtomobil benzini üzrə 239,9 min ton və ya 14,7 faiz, dizel yanacağı üzrə isə 298,5 min ton və ya 13,7 faiz azalma ilə proqnozlaşdırılmasıdır.

Qeyri-neft sektoru artım isə növbəti ildən bir sıra aksizli malların aksiz dərəcələrinin artırılması ilə bağlıdır.

SOCAR-dan AzerVoice-ün sorğusuna cavab olaraq bildirilib ki, 2026-cı ildə də Heydər Əliyev adına Neft Emalı Zavodunda A-92 və A-95 markalı benzinin istehsalı davam etdiriləcək:

"Heydər Əliyev adına Neft Emalı Zavodunda hazırda tətbiq olunan istehsal prosesləri çərçivəsində Avropa standartlarına (Avro-5) uyğun A-92 və A-95 markalı benzin istehsalı həyata keçirilir. Məlumat üçün bildiririk ki, 2026-cı ildə də zavodda A-92 və A-95 markalı benzin istehsalı davam etdiriləcək".

Qeyd edilib ki, zavodda tətbiq olunan müasir texnologiyalar və yenilənmiş istehsal infrastrukturu istehlakçılara yüksək keyfiyyətli və ekoloji standartlara cavab verən yanacaq təqdim edilməsinə imkan yaradır.