BAKI, AzerVoice
ABŞ Prezidenti Donald Trampın Amerika gəmilərinin Panama və Süveyş kanallarından pulsuz keçməsi ilə bağlı təklifi Misirdə geniş qəzəb doğurub.
AzerVoice xəbər verir ki, Trampın sözləri Misir mediasında, parlament üzvləri və sosial şəbəkə istifadəçiləri arasında geniş müzakirəyə səbəb olub.
Qahirə bu məsələ ilə bağlı rəsmi açıqlama verməsə də, Misir KİV-ləri bəzən susmağın cavab ola biləcəyini bildirib.
Mənbələr bildiriblər ki, Misir administrasiyası zərurət yaranarsa, rəsmi diplomatik kanallar vasitəsilə Vaşinqtona öz mövqeyini çatdıracaq. Bundan əlavə bildirilib ki, Süveyş Kanalı Konstantinopol Konvensiyası ilə tənzimlənir və heç bir dövlət bu kanaldan pulsuz keçmək hüququna malik deyil.
Xatırladaq ki, Tramp Truth Social sosial şəbəkəsində ABŞ-nin hərbi və ticarət gəmilərinin Panama və Süveyş kanallarından sərbəst keçməsinə icazə verilməsini tələb edib.
"Amerika hərbi və ticarət gəmilərinin Panama və Süveyş kanallarından sərbəst keçməsinə icazə verilməlidir. Bu kanallar ABŞ olmasaydı mövcud olmazdı. Dövlət katibi Marko Rubioya bu məsələni ələ alması üçün tapşırıq verdim" - deyə, o bildirib.
ABŞ-ın milli təhlükəsizlik müşaviri Mayk Uolts isə bildirib ki, Amerika müdafiə etdiyi bir kanal üçün keçid haqqı ödəməməlidir.
Misir parlamentinin üzvü Mustafa Bəkri Trampın sözlərini "şantaj cəhdi" adlandırıb və bildirib ki, Süveyş Kanalı tamamilə Misirə məxsusdur.
Jurnalist Əhməd Musa Trampın bəyanatını son dərəcə təhlükəli adlandıraraq qeyd edib ki, ABŞ Süveyş Kanalının tikintisində iştirak etməyib və qanunlara əsasən, bütün gəmilər keçid haqqı ödəməlidir.
Jurnalist Ləmis əl-Hədid isə Trampa xatırladıb ki, Süveyş Kanalı 1869-cu ildə açılıb və həmin vaxt ABŞ vətəndaş müharibəsindən yeni çıxmışdı. O əlavə edib ki, Trampın bəyanatı ABŞ gəmiləri üçün xüsusi güzəştlər əldə etmək məqsədi ilə atılan bir addım ola bilər.
