BAKI, AzerVoice, Orxan Qədirzadə
Hizbullah Papanın Livana bu həftəsonu gözlənilən səfəri ərəfəsində pontifik Leo XIV-ə müraciət edərək İsrailin “ədalətsizlik və davam edən təcavüzünün” pislənməsini istəyib. Təşkilatın bəyanatı qrupun sosial media hesablarında dərc olunub.
AzerVoice xəbər verir ki, müraciət Livanın cənubunda bir ildən artıq davam edən qarşıdurma və ötən ilin noyabrında elan olunmuş atəşkəsə baxmayaraq bölgədə gərginliyin azalmadığı bir vaxtda yayılıb. Hizbullahın İsrailə qarşı hücumları 2023-cü ilin sonunda Qəzza münaqişəsi fonunda sərhəd boyunca intensivləşmiş və iki ay davam edən açıq qarşıdurmada təşkilat ciddi itkilər vermişdi.
Livan hökuməti ABŞ-ın təzyiqi altında Hizbullahın tərksilahı ilə bağlı öhdəlik götürdüyünü açıqlasa da, təşkilat bu planı qəti şəkildə rədd edir. İsrail isə son aylarda həyata keçirdiyi hava zərbələrinin qrupun hərbi mövqelərinə və operativ heyətinə yönəldiyini bildirir və cənubda strateji hesab etdiyi beş mövqedə hərbi kontingent saxlayır.
Hizbullahın bəyanatında ölkədə “birgəyaşamanın qorunmasına sadiqlik” qeyd edilsə də, qrup “ordu və xalqla birlikdə hər cür təcavüzə qarşı dayanmaq” niyyətini vurğulayıb. Təşkilat İsrailin Livana qarşı fəaliyyətini “qəbuledilməz davam edən təcavüz” adlandıraraq Papanın bu vəziyyətə diqqət yetirəcəyinə ümid edib.
Hizbullahın yüksək rəsmisi Nəim Qəsəm cümə günü çıxışında Papanın səfərini “həlledici məqam” kimi qiymətləndirib. O, təşkilatın atəşkəsə riayət etdiyini, lakin İsrail hücumlarının davam etməsinin bölgədə yeni gərginlik riskini artırdığını deyib. Qəsəm həmçinin genişmiqyaslı münaqişənin yenidən başlaya biləcəyini istisna etmədiyini bildirib.
Papanın Türkiyə səfərindən sonra bazar günü Livana gəlməsi gözlənilir. Üç günlük proqram çərçivəsində Beyrut sahilində 120 min nəfərin iştirakı nəzərdə tutulan açıq hava ayini və şəhər mərkəzində dinlərarası görüş keçiriləcək. Qəsəm bildirib ki, “bu səfər mühüm bir dövrdə baş tutur və ümid edirik ki, Papa Livanda sülhün möhkəmlənməsinə və təcavüzün dayandırılmasına töhfə verəcək”.