BAKI,AzerVoice

Misir Qızıl Aypara Cəmiyyəti cümə axşamı bildirib ki, İsrail və HƏMAS arasında atəşkəs razılaşmasının elanından sonra 153 yardım maşını Qəzza zolağına doğru hərəkət edir. AzerVoice xəbər verir ki, yardım karvanı Rəfah keçid məntəqəsinin yan yolundan keçərək Kərəm Əbu Salim keçidinə istiqamətlənib və oradan Qəzzaya daxil olacaq. Yardım konvoyuna 80 yük maşını BMT-yə, 17-si Misir Qızıl Ayparasına, 21-i isə Qətərə məxsusdur.

BMT-nin baş katibi Antonio Quterreş razılaşmaya münasibət bildirərək qeyd edib ki, Qəzzada “silahların susması” kifayət deyil və “humanitar yardımın qarşısında duran maneələrin aradan qaldırılması” vacibdir.

“Atəşkəsin real irəliləyişə çevrilməsi üçün təkcə silahların susması kifayət deyil. Humanitar işçilər üçün tam, təhlükəsiz və davamlı giriş təmin edilməli, inzibati və logistika maneələri aradan qaldırılmalıdır,” - deyə Quterreş vurğulayıb.

BMT rəhbəri əlavə edib ki, təşkilat Qəzzaya yardımın çatdırılmasını genişləndirməyə hazırdır.

“Biz və tərəfdaşlarımız dərhal hərəkət etməyə hazırıq. Lazımi resurslarımız, paylama şəbəkələrimiz və yerli icmalarla əlaqələrimiz mövcuddur. Qida, su, səhiyyə və sığınacaq sahələrində yardımı artırmaq mümkündür.”- deyə Quterreş əlavə edib.

Quterreş həmçinin beynəlxalq donorları maliyyə dəstəyini artırmağa çağırıb.

İsrail və HƏMAS arasında əldə olunan atəşkəs və girovların azad olunması barədə razılaşma ABŞ Prezidenti Donald Trampın təşəbbüsü və onun birbaşa təzyiqləri nəticəsində mümkün olub.