BAKI, AzerVoice
İsrail və İran arasında 12 gün davam edən münaqişə zamanı İranda 30 şagird və 7 müəllim həlak olub.
AzerVoice xəbər verir ki, bu barədə İranın Təhsil naziri Əlirza Kazımi bildirib.
Nazirin sözlərinə görə, ölən 30 şagirddən 21-i Tehrandan olub. Bundan əlavə, bir şagird yaralanıb.
"İsrailin hücumları nəticəsində 36 məktəb zərər görsə də, sürətlə bərpa edilərək yenidən fəaliyyətə başlayıb" - deyə, Kazımi əlavə edib.
Təhsil fəaliyyəti dayandırılmayıb. Bütün iclaslar və fəaliyyətlər plan üzrə həyata keçirilib. Dövlət məktəblərinə qəbul imtahanları iyul 20-dək təxirə salınıb. Həmçinin, qəbul imtahanlarının keçirilməsinin mümkünsüz olduğu halda, alternativ qiymətləndirmə üsulları ilə bağlı ssenarilər də hazırlanıb.
Kazımi həmçinin bildirib ki, Təhsil Nazirliyində müharibə şəraitini idarə etmək üçün 14 komitədən ibarət Koordinasiya və İdarəetmə Qərargahı yaradılıb və fövqəladə vəziyyətlər üçün müxtəlif ssenarilər hazırlanıb.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.
