BAKI, AzerVoice
İran Silahlı Qüvvələrinin Baş Qərargah rəisi general-leytenant Əbdülrəhim Musəvi, İsraillə İran arasında baş vermiş 12 günlük müharibədən sonra elan edilmiş atəşkəs rejiminin davamlılığı ilə bağlı ciddi şübhələrinin olduğunu bəyan edib.
AzerVoice xəbər verir ki, Musəvi bu fikirləri Səudiyyə Ərəbistanının müdafiə naziri Xalid bin Salman Al Səudla keçirdiyi telefon danışığı zamanı səsləndirib.
“Biz bu müharibəni başlatmamışdıq, lakin təcavüzkara (İsrailə - red.) bütün gücümüzlə cavab verdik. Qarşı tərəfin atəşkəs öhdəliklərinə əməl edəcəyinə inanmırıq. Yeni bir hücum halında qətiyyətli cavab verməyə hazırıq” – deyə, o bildirib.
Generalın sözlərinə görə, İsrailin İranın ABŞ-la danışıqlarda sülh meyli göstərdiyi bir dövrdə hücuma keçməsi, Tel-Əvivin niyyətlərinin etibarsızlığını nümayiş etdirir.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.
