BAKI, AzerVoice
İsrailin Tehrandakı "Evin" həbsxanasına hücumu nəticəsində indiyə qədər 71 nəfər həlak olub.
AzerVoice-un məlumatına görə, bu barədə İran Ədliyyə Sisteminin sözçüsü Əsğər Cahangir məlumat verib.
Onun sözlərinə görə, ölənlər arasında həbsxana əməkdaşları, əsgərlər, məhkumlar və həbsxana yaxınlığında yaşayan sakinlər də var.
Əsğər Cahangir qeyd edib ki, bu hücum nəticəsində yalnız həbsxana işçiləri deyil, məhkumalrla görüşə gəlmiş ailə üzvləri və həbsxanaya bitişik ərazidə yaşayan qonşular ciddi şəkildə zərər çəkib. Bəzi sakinlər həm maddi, həm də bədən xəsarətləri alıb.
Yaralıların bəziləri hadisə yerində ilkin yardım alıb, bəziləri isə xəstəxanalara köçürülərək müalicə olunub və artıq evə buraxılıblar.
Qeyd edək ki, iyunun 22-də İsrailin Tehran üzərindəki hücumları çərçivəsində "Evin" həbsxanası da hədəfə alınıb. Raket partlayışları həbsxana strukturlarına ciddi ziyan vurub. Hücumdan sonra İsrail mediası həbsxanada qiyam və atışma baş verdiyini iddia etsə də, bu xəbərlər İranın rəsmi mənbələri tərəfindən təkzib olunub.
İyunun 23-də İran polisinin sözçüsü Sərdar Müntəzərülmehdi "Evin" həbsxanası ətrafında partlamamış iki raketin tapıldığını və zərərsizləşdirildiyini bildirib.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.
