BAKI, AzerVoice

Türkiyə Prezidenti Rəcəb Tayyib Ərdoğan, ABŞ prezidenti Donald Tramp ilə apardıqları müzakirələr nəticəsində F-35 proqramına yenidən daxil olmaqla bağlı texniki səviyyədə danışıqların başladığını bildirib.

AzerVoice xəbər verir ki, Ərdoğan qeyd edib ki, Türkiyə F-35 layihəsindən imtina etməyib və bu məsələni müvafiq tərəfdaşları ilə müzakirə edir.

"F-35 texniki olduğu qədər siyasi xarakter daşıyan bir prosesdir. Türkiyə haqsız yerə proqramdan çıxarılıb və bu, müttəfiqlik ruhuna uyğun deyil"- deyə o vurğulayıb.

Ərdoğan, ABŞ prezidenti Donald Tramp ilə regional və qlobal məsələlər, eləcə də NATO əməkdaşlığı və ikitərəfli münasibətlər daxil olmaqla geniş mövzular ətrafında səmərəli görüş keçirdiklərini bildirib.

"ABŞ ilə 100 milyard dollarlıq ticarət hədəfimiz var və buna çatmaq istəyirik" – deyə əlavə edib.

Hava hücumundan müdafiə sahəsində atılan addımlardan danışan Ərdoğan, yalnız S-400-lərlə kifayətlənmədiklərini və çoxqatlı hava müdafiə sistemləri qurduqlarını söyləyib.

Ərdoğan, bəzi müttəfiqlərin Türkiyəyə pul qarşılığında belə silah satmadığını və bu səbəbdən yerli və milli müdafiə sənayesinin gücləndirildiyini bildirib.

“Milli PUA-larımızı, milli döyüş təyyarəmiz KAAN-ı istehsal etdik. KAAN-ı lağa qoyanlar indi göylərdə uçuşunu seyr edirlər” – deyə Ərdoğan vurğulayıb.