BAKI, AzerVoice
ABŞ-da pərakəndə satışların güclü nəticələr göstərməsi fonunda dolların əsas dünya valyutalarına qarşı məzənnəsinin artması qızılın qiymətinin enməsinə səbəb olub.
AzerVoice-un məlumatına görə, Bakı vaxtı ilə saat 18:25-də Comex birjasında avqust fyuçerslərinin qiyməti 0,8 faiz azalaraq bir troy unsiyası üçün 3 333 ABŞ dollarına düşüb.
London ICE birjası tərəfindən hesablanan DXY indeksi (dolların avro, İsveçrə frankı, yapon yeni, Kanada dolları, funt-sterlinq və İsveç kronuna qarşı nisbətini göstərir) 0,3 faiz artıb. Dolların güclənməsi, qiymətli metallar kimi xammala olan tələbi azaldır.
Bugün açıqlanan statistikaya əsasən, ABŞ-da iyun ayında pərakəndə satışlar əvvəlki ayla müqayisədə 0,6 faiz artıb. Bu göstərici, analitiklərin gözlədiyi 0,1 faizlik artımı xeyli üstələyib. Qeyd edək ki, may ayında satışlar 0,9 faiz azalmışdı. İllik müqayisədə isə pərakəndə satışlar iyun ayında 3,9 faiz artıb (may ayında bu artım 3,3 faiz idi).
Bununla yanaşı, investorlar ABŞ Federal Ehtiyat Sisteminin (FED) rəhbəri Cerom Pauellin mümkün istefası ilə bağlı yayılan şayiələri də diqqətlə izləyirlər. Qərb mediası ABŞ Prezidenti Donald Trampın Pauelli vəzifədən azad edə biləcəyi barədə yazsa da, Tramp daha sonra jurnalistlərə açıqlamasında bu addımı atmağı planlaşdırmadığını, sadəcə bu məsələni konqres üzvləri ilə "nəzəri müzakirə" etdiyini bildirmişdi.
