BAKI, AzerVoice

Qızılın unsiyası, cari ilin ilk yarısında ABŞ-ın gömrük rüsumları ilə bağlı narahatlıqlar, geosiyasi risklər, mərkəzi bankların alışı və dolların zəifləməsi ilə rekord səviyyəyə yüksəlib.

AzerVoice xəbər verir ki, ilin ikinci yarısında qlobal risklərin azalacağı gözləntilərinə paralel olaraq qiymətlərin stabilləşəcəyi proqnozlaşdırılır.

Belə ki, qızılın unsiyası ilin ilk yarısında 26 faiz artaraq 3 303 dollara qədər yüksəlib. Bu dövrdə ən yüksək aylıq artım mart ayında 9,3 faiz ilə müşahidə olundu. Ticarət müharibələrinə dair artan qeyri-müəyyənliklər və Federal Ehtiyat Sistemi (FED) ilə ABŞ hökuməti arasında fikir ayrılıqları ilə bağlı narahatlıqlar aprel ayında qızılın qiymətini 3 499,99 dollara qədər qaldırdı.

Qeyd edək ki, il başlananda bazarlar qlobal inflyasiya və resessiya dilemması ilə mərkəzi bankların "yumşaq pul" siyasətinə keçəcəyi gözləntiləri ilə qarşılaşıb. Bu dövrdə davam edən qlobal qeyri-müəyyənliklər və risklər, investorların "təhlükəsiz liman" axtarışını artırıb və bu da qızılın tələbini gücləndirib.

Xüsusilə ABŞ Prezidenti Donald Trampın yanvarın 20-də vəzifəyə başlaması ilə gündəmi zəbt edən gömrük rüsumları mövzusu, dünya iqtisadi mənzərəsinə dair narahatlıqları artırdı. ABŞ-ın yaxın ticarət əlaqələrində olduğu ölkələrlə problemlər yaşaması bu məsələ ilə bağlı riski yüksəltdi. Götürülən rüsumların inflyasiyanı artıracağı ehtimalı isə ABŞ Mərkəzi Bankının siyasət imkanlarını məhdudlaşdırdı.

Digər tərəfdən, ABŞ-ın artmaqda olan büdcə kəsiri ilə bağlı narahatlıqlar da qızıl qiymətlərini yuxarı istiqamətdə dəstəkləyən ikinci amil oldu.