BAKI,AzerVoice
İslam inancına görə, cinlərin və şeytanın varlığı danılmaz həqiqətdir və bu mövzu Qurani-Kərimdə bir sıra ayələrlə açıq şəkildə bəyan olunmuşdur. Müxtəlif surələrdə onların insanlarla münasibətləri, iman gətirənləri doğru yoldan azdırma cəhdləri və eyni zamanda haqqı qəbul edən cinlərin mövcudluğu qeyd edilir.
Peyğımbərin sünnəsində cinlərin və şeytanın varlığınına dair dəlillər
Ənəs ibn Malik (r.a.) bildirir ki, o, bir dəfə Həzrət Peyğəmbərlə (s.ə.s.) birlikdə Məkkə dağlarına çıxmışdı. Bu zaman bir qoca gəldi. Peyğəmbərimiz (s.ə.s.) buyurdu:
“– Sən cinlərin gəzdiyi kimi gəzdin, səsin də onlarınkı kimidir.”
Qoca isə “Bəli” deyə cavab verdi. Peyğəmbər (s.ə.s.) soruşdu:
“– Hansı cindəsən?”
Qoca cavab verdi:
“– Mən Həmə ibn Ləhiyəm.”
Peyğəmbər (s.ə.s.) soruşdu:
“– Sənin neçə yaşın var?”
Qoca cavab verdi:
“– Qabil, Habili öldürdükdə biz bir neçə yaşında uşaqlar idik. Daha sonra bir az böyüdüm və təpələr üzərində heyvanları öldürərdim, insanların arasına fitnə salardım.”
Bunun üzərinə Peyğəmbərimiz (s.ə.s.) buyurdu:
“– Nə pis işlərlə məşğul olarmışsan.”
Qoca dedi:
“– Ya Rəsuləllah! Mən Həzrət Nuh (ə.s.)-a iman edənlərdən oldum və onun hüzurunda tövbə etdim. Doğrudur, əvvəlcə Nuh peyğəmbərə qarşı çıxmışdım. O ağladı, mən də ağladım. O gündən bəri peşmanam. Həzrət Huda, Həzrət İbrahimə iman gətirdim. Nəmrud İbrahimi oda atarkən mən onun yanında idim. Həzrət Yusif quyunun içinə atıldıqda mən də orada idim, ondan əvvəl aşağı endim. Həzrət Şüeyb və Musa ilə birlikdə oldum. Həzrət İsaya rast gəldim. O mənə dedi: “– Əgər Həzrət Məhəmmədi (s.ə.s.) görsən, mənim salamımı çatdır.Mən indi onun salamını çatdırıram.”
Peyğəmbərimiz (s.ə.s.) salamı alıb buyurdu:
“– Ey Həmə, istəyin nədir?”
Qoca dedi:
“– Həzrət Musa mənə Tövratı öyrətdi, Həzrət İsa mənə İncili öyrətdi. Sən də mənə Quranı öyrət.”
Rəvayətə görə, Peyğəmbərimiz (s.ə.s.) ona on surə öyrətdi. Lakin Həzrət Peyğəmbərin vəfatından sonra həmin cin bir daha görünmədi.