BAKI, AzerVoice, Nailə Babazadə

İsrailin hücum etdiyi Əzm Donanmasında qanunsuz şəkildə saxlanılan bir qrup türk vətəndaşı İordaniya üzərindən Türkiyəyə qayıtmaq üçün İordan çayının qərb sahilində yerləşən sərhəd-keçid məntəqəsinə çatıb.

AzerVoice xəbər verir ki, Türkiyə Xarici İşlər Nazirliyinin sözçüsü Öncü Keçeli bildirib ki, İsrail tərəfindən ələ keçirilən Əzm Donanmasının gəmilərində olan 14 türk vətəndaşı bu səhər quru yolu ilə İordaniyaya keçib.

Keçeli əlavə edib ki, həmin şəxslər Ammandan hava yolu ilə Türkiyəyə qayıdacaqlar və bununla da donanmanın bütün türk iştirakçıları vətənə dönmüş olacaq.

İsrail, Əzm Donanmasında yer alan 480 fəalı beynəlxalq sularda qanunsuz olaraq saxlamışdı. Onlardan 4 italiyalı parlament üzvü ilk gün azad edilib. Ardınca şənbə günü 36 türk və 137 fəal Türkiyənin ayırdığı Türk Hava Yollarına məxsus təyyarə ilə İsraildən təxliyə olunmuşdu.

Bazar günü 29 fəal İspaniyaya, bazar ertəsi isə 171 fəal Yunanıstan və Slovakiyaya göndərilmişdi.

Qeyd edək ki, İsrailin Qəzzaya tətbiq etdiyi blokadanı qırmaq və bölgəyə humanitar yardım çatdırmaq məqsədilə yola çıxan Qlobal Sumud Donanması, 1 oktyabr axşamı Qəzza sahillərinə yaxınlaşıb.

İsrail ordusu donanmaya hücum edərək, onlarla gəmi və qayıqdan ibarət olan donanmanı qanunsuz şəkildə ələ keçirib və yüzlərlə sərnişini saxlayıb.

Bu donanma, indiyədək Qəzzaya humanitar yardım aparmaq məqsədilə yola çıxan ən böyük təşkilatlanmış yardım missiyası hesab olunur.