BAKI,AzerVoice, Fərid Mikayılov

Türkiyə Prezidenti Rəcəb Tayyib Ərdoğan Sultanbeylidə keçirilən toplu açılış və təməlqoyma mərasimində çıxış edərək Qəzzədə davam edən humanitar böhrana diqqət çəkib.

AzerVoice xəbər verir ki, Ərdoğan bildirib ki, iki ildən bəri bölgədə yaşanan “soyqırımın” dayandırılması üçün Türkiyə humanitar yardımdan diplomatik kanallara qədər bütün imkanlarını səfərbər edib.

Onun sözlərinə görə, məqsəd Qəzza əhalisini ən qısa zamanda sülh və təhlükəsizliyə qovuşdurmaqdır.

O, son günlər Nyu-York və Vaşinqtonda apardığı təmaslarda mövzunu beynəlxalq gündəmə daşıdıqlarını vurğulayıb.

Ərdoğan, həmçinin ABŞ Prezidenti Donald Tramp ilə sözügedən məsələni ətraflı müzakirə etdiyini bildirib.

“HƏMAS-ın Trampın sülh planına müsbət cavabı bölgədə qalıcı sülh üçün yeni bir fürsət pəncərəsi açdı” – deyə Ərdoğan qeyd edib.

Türkiyə lideri İsrailin hücumlarını dərhal dayandırmasının vacibliyini bildirib və bütün tərəfləri məsuliyyətli davranmağa çağırıb.

“Tək bir günahsız insanın daha həyatını itirməməsi üçün nə lazımdırsa, Türkiyə olaraq bunu etməyə davam edəcəyik” – deyə o əlavə edib.

Ərdoğan həmçinin Əzm Donanmasının iştirakçılarının bir saat ərzində İstanbul Hava Limanına çatacağını açıqlayaraq, Fələstin xalqına həmrəylik mesajı göndərib və Türkiyənin hər zaman onların yanında olacağını vurğulayıb.