BAKI, AzerVoice, Səməd Əyyubov

Məhəmməd peyğəmbər və Musa peyğəmbərin karikaturasının Leman jurnalında dərc olunmasına dair aparılan istintaq çərçivəsində jurnalı idarə edənlərin də daxil olduğu 6 şübhəli barəsində ittiham aktı hazırlanıb.

AzerVoice-un məlumatına görə, İstanbul Baş Prokurorluğu tərəfindən iyunun 26-da Leman jurnalında dərc olunmuş karikatura ilə bağlı başlanmış istintaq başa çatıb.

Hazırlanan ittiham aktında məsul redaktorlar Zafer Aknar və Aslan Özdemir, müəssisə müdiri Ali Yavuz, qrafik dizayner Cebrail Okçu, həmçinin barəsində axtarış qərarı çıxarılan baş redaktor Mehmet Tuncay Akgün mətbuat və yayım yolu ilə xalqı kin və düşmənçiliyə açıq şəkildə təhrik etməkdə ittiham olunurlar. Prokurorluq onların hər biri üçün 1 il 6 aydan 4 il 6 aya qədər həbs cəzası tələb edib.

Karikaturanın müəllifi Doğan Pehlevan barəsində isə ardıcıl şəkildə mətbuat və yayım yolu ilə xalqı kin və düşmənçiliyə açıq şəkildə təhrik etmək ittihamı irəli sürülərək 1 il 10 ay 15 gündən 7 il 6 aya qədər həbs cəzası istənilib. İttiham aktı hazırda araşdırılır.

Xatırladaq ki, istintaq çərçivəsində Doğan Pehlevan Prezidentə təhqir və xalqı kin və düşmənçiliyə təhrik və ya alçaltmaq maddələri üzrə, yazı işləri müdiri Zafer Aknar, müəssisə müdiri Ali Yavuz və qrafik dizayner Cebrail Okçu isə xalqı kin və düşmənçiliyə təhrik və ya alçaltmaq ittihamı ilə həbs edilmişdi.

Digər şübhəli, yazı işləri müdiri Aslan Özdemirin isə ölkə xaricində olduğu, İstanbul Hava Limanından Türkiyəyə giriş edəcəyi müəyyənləşdirilmişdi. Baş Prokurorluğun göstərişi ilə onun hava limanında saxlanılması barədə polisə təlimat verilmiş və Fransadan gələn təyyarədən endikdən sonra nəzarətə alınaraq məhkəmə qərarı ilə həbs edilmişdi.