BAKI, AzerVoice, Səməd Əyyubov
“Terrorsuz Türkiyə” prosesinin heç bir mərhələsində terror təşkilatı ilə danışıqlar aparılmayıb və bundan sonra da aparılmayacaq.
AzerVoice xəbər verir ki, bunu Türkiyə Böyük Millət Məclisinin (TBMM) sədri Numan Kurtulmuş Malazgirt Zəfərinin 103-cü ildönümü münasibətilə Afyonkarahisar şəhərində qeyri-hökumət təşkilatlarının (QHT) nümayəndələri ilə görüşdə çıxış edərkən deyib.
Kurtulmuş prosesin heç bir mərhələsində terror təşkilatı ilə danışıqlar aparılmadığını, bu mövzuda muxtariyyət, ayrıca bölgə və ya fərqli dillərin rəsmi dil elan olunması ilə bağlı heç bir tələb olmadığını vurğulayıb. O həmçinin, təşkilat rəhbərinin azadlığa buraxılması ilə əlaqədar da heç bir təşəbbüsün irəli sürülmədiyini qeyd edib.
Bununla yanaşı Kurtulmuş, ək avqust ayının Türk tarixi üçün xüsusi əhəmiyyət daşıdığını vurğulayıb.
Kurtulmuş, Malazgirt döyüşü ilə Anadolunun qapılarının türklərə və müsəlmanlara açıldığını və əbədi olaraq Türk yurdu kimi miras buraxıldığını söyləyib. O, əsrlər sonra dünyanın müxtəlif güclərinin Anadolunu ələ keçirmək planlarına baxmayaraq, xalqın yoxsulluq və çətinliklər içində mübarizə apararaq qurtuluş savaşını qazandığını, bu müharibənin ən mühüm mərhələlərindən birinin isə 26-30 avqust tarixlərində keçirilən Böyük Hücum olduğunu bildirib. TBMM sədri Mustafa Kamal Atatürk başda olmaqla bütün sərkərdələri və şəhidləri yad edib.
Qeyd edək ki, tədbirdə Afyonkarahisar valisi Kübra Güran Yiğitbaşı, Afyonkarahisar Ticarət və Sənaye Palatasının rəhbəri Hüsnü Serteser, sabiq nazir Veysel Eroğlu, millət vəkilləri və vətəndaş cəmiyyəti nümayəndələri iştirak edib.
