BAKI,AzerVoice
4 noyabr 2025-ci il tarixində Səmərqənddə keçirilən YUNESKO-nun Baş Konfransının 43-cü sessiyası çərçivəsində Türk dünyası üçün mühüm əhəmiyyətə malik tarixi təqdimat baş tutacaq.
AzerVoice xəbər verir ki, Türk Mədəniyyəti və İrsi Fondu ilk dəfə olaraq türk sivilizasiyasının zəngin mirasını əks etdirən iki böyük layihəni beynəlxalq auditoriyaya təqdim edəcək.
Təqdim olunan layihələr aşağıdakılardır:
▪ “Türk Dünyasının Mədəni Kodu” kataloqu – Türk Dövlət Başçılarının qəbul etdiyi “Türk Dünyasına Baxış–2040” və “TURKTIME” strateji sənədlərinə əsasən hazırlanmış, türk xalqlarının mədəni irsini əhatə edən geniş kataloq;
▪ “Türk Folklor İrsi” Antologiyası – Özbəkistan Prezidenti Şavkat Mirziyoyevin təşəbbüsü və Türk dövlət başçılarının dəstəyi ilə çoxcildli, çoxdilli nəhəng nəşr layihəsi.
Fondun məlumatına görə, bu layihələrin icrasında Türk dünyasının tanınmış alim və mütəxəssisləri iştirak edib. Onlar türk xalqlarının çoxəsrlik mədəni, elmi və folklor irsinin toplanması, sistemləşdirilməsi və gələcək nəsillərə ötürülməsi işinə mühüm töhfə veriblər.
Türk Dili Ailəsi Gününün qeyd olunması
Proqram çərçivəsində, həmçinin, YUNESKO-nun 43-cü sessiyası tərəfindən 3 noyabr 2025-ci ildə rəsmən qəbul edilmiş Türk Dili Ailəsi Gününün (World Turkic Language Family Day) qeyd edilməsi ilə bağlı tədbir keçiriləcək.
Tədbirdə Azərbaycan, Qazaxıstan, Qırğızıstan, Türkiyə, Türkmənistan, Özbəkistan və Macarıstanın YUNESKO yanında Daimi Nümayəndəliklərinin rəhbərləri, diplomatik korpus, beynəlxalq təşkilatlar, alimlər, mədəniyyət institutlarının rəhbərləri, media nümayəndələri iştirak edəcəklər.
Mərasim Türk mədəniyyətinin səfirləri hesab olunan “Turan” etno-folklor ansamblının çıxışları ilə müşayiət olunacaq.
Tədbir türk xalqlarının dil və mədəni birliyinin beynəlxalq səviyyədə tanınmasına xidmət etməklə yanaşı, türk sivilizasiyasının dünya mədəniyyatına və humanitar əməkdaşlığa verdiyi töhfəni bir daha nümayiş etdirəcək.
Təşkilatçı: Türk Mədəniyyəti və İrsi Fondu (Bakı, Azərbaycan)
Əlaqə:
Ləman Şahmuradova – +994 50 737 00 08
Serik Nurmoldayev – +7 705 802 20 58
Email: [email protected]
Web: turkicheritage.org | heritageturkic.org
