BAKI,AzerVoice,Fərid Mikayılov

Barselona, öz yetirməsi olan 22 yaşlı Fermin Lopezi Çelsidən gələn cazibədar təklifə baxmayaraq komandada saxlaya bilib.

AzerVoice xəbər verir ki, Çelsi Lopezi transfer etmək istəyib, lakin Barselonanın 90 milyon avroluq qiymətini ödəməyə yanaşmayıb.

Futbolçu isə az oyun vaxtı almasına görə narahat olduğunu baş məşqçi Hansi Fliklə bölüşüb. Flik Lopezin bacarığını qəbul etsə də, ulduzlarla dolu heyətdə ona müntəzəm oynamağa zəmanət verə bilməyib.

Buna baxmayaraq, alman mütəxəssis gənc oyunçunun komandanın planlarında yer aldığını vurğulayıb.

Lopez daha sonra idman direktoru Deco ilə görüşüb. Deco, yalnız 90 milyon avroluq rəsmi təklif gəldiyi halda transferə icazə veriləcəyini bildirib. Bu arada, Lopezin komanda yoldaşları — qapıçı Ter Şteqen, müdafiəçi Arauxo və hücumçu Rafinya — onun qalması üçün təşviq ediblər. Bu dəstək gənc futbolçunun qərarında mühüm rol oynayıb.

La Masiya akademiyasının yetirməsi olan Lopez, müsahibəsində “Barselona həmişə mənim prioritetim olub. Əsas heyətdə özümü təsdiq etmək uşaqlıq arzumdur” sözlərini deyib.

Milli komandadan qayıdan Lopez, qarşıdakı həftədə Flikin rəhbərliyi altında sıx oyun marafonuna qoşulacaq. Villarreal, Nyukasl və Xetafe ilə qarşılaşmalar ərəfəsində Qavi və Frenki de Yonqun zədələri, onun daha çox şans qazanmasına imkan yarada bilər.