BAKI, AzerVoice, Nailə Babazadə

Türkiyə A Milli Futbol Komandası, 2026 FIFA Dünya Kubokunun Avropa seçmə mərhələsi çərçivəsində ilk oyununda Gürcüstan millisi ilə qarşılaşacaq. Bu görüş, iki komanda arasında tarixdə 7-ci duel olacaq.

AzerVoice xəbər verir ki, ay-ulduzlular indiyədək Gürcüstanla keçirilmiş 6 oyunda 4 qələbə qazanıb, 1 heç-heçə edib və 1 məğlubiyyətlə meydanı tərk edib. Bu oyunlarda Türkiyə rəqib qapısından 15 top keçirib, qapısında isə 6 qol görüb.

İki komanda son dəfə 2024-cü ildə Almaniyada keçirilən Avropa Çempionatının qrup mərhələsində üz-üzə gəlib. Dortmund şəhərində oynanılan qarşılaşmada Türkiyə millisi Gürcüstan üzərində 3:1 hesablı qələbə qazanıb.

Bu oyunda Türkiyənin qollarını Mert Müldür, Arda Gülər və Kərəm Aktürkoğlu vurub. Gürcüstanın yeganə qoluna isə Mikautadze imza atıb.

Türkiyə ilə Gürcüstan yığmaları ilk dəfə 21 avqust 2002-ci ildə Trabzonda qarşılaşıb. Hüseyn Avni Aker stadionunda keçirilən yoldaşlıq oyununda Türkiyə 3:0 hesabı ilə qalib gəlib.

Daha sonra, 2006 Dünya Kubokunun seçmə mərhələsində iki dəfə qarşılaşan komandaların Trabzondakı ilk oyunu 1:1 hesabı ilə başa çatıb. Tiflisdə keçirilən cavab görüşündə isə Türkiyə millisi 5:2 qalib gəlib. Həmin oyunda Tolga Seyhan, Fatih Tekke (2), Koray Avcı və Tuncay Şanlı fərqlənib.

2007-ci ildə Tiflisdə oynanılan yoldaşlıq oyununda Gürcüstan millisi 1:0 hesablı qələbə qazanıb. 2012-ci ildə keçirilmiş növbəti yoxlama matçında isə Türkiyə Hamit Altıntop, Nuri Şahin və Selçuk İnanın qolları ilə 3:1 hesablı qələbə əldə edib.