BAKI, AzerVoice, Fərid Mikayılov
Qalatasaray rəhbərliyi müdafiə xəttinə gücləndirmə məqsədilə Mançester Sitidə çıxış edən isveçrəli futbolçu Manuel Akanji üçün rəsmi transfer təklifi irəli sürüb.
AzerVoice xəbər verir ki, Qalatasaray Akanji üçün 12 milyon funt-sterlinq + 3 milyon funt bonus daxil olmaqla ümumilikdə 15 milyon funt-sterlinqlik təklif təqdim edib.
Lakin İngiltərə mətbuatı Mançester Sitinin təcrübəli müdafiəçini yalnız 25 milyon funt-sterlinq qarşılığında buraxmaq istədiyini yazıb.
Akanji tərəfinin illik 7 milyon avro maaş istədiyi bildirilir.
Qalatasaray rəhbərliyi isə futbolçuya maksimum 4-5 milyon avro aralığında təklif verməyi planlaşdırır.
Sarı-qırmızılılar komandada maaş balansını qorumaq üçün Davinson Sançesin aldığı məbləğdən yüksək ödəniş etmək istəmir.
Manuel Akanjinin Mançester Sitidən ayrılmağa tələsmədiyi və digər təklifləri də dəyərləndirmək niyyətində olduğu vurğulanır. Qalatasaray isə həm klub, həm də oyunçu ilə danışıqları davam etdirərək transfer şərtlərinin yumşaldılmasına çalışır.
