BAKI, AzerVoice, Fərid Mikayılov
Türkiyənin Fənərbaxça klubu Vest Hemin meksikalı futbolçusu Edson Alvarezi heyətinə qatmaq üzrədir.
AzerVoice xəbər verir ki, 27 yaşlı yarımmüdafiəçi icarə əsasında İstanbul təmsilçisinə qoşulacaq və müqavilədə satınalma opsiyası da yer alacaq.
Məhşur futbol jurnalisti Fabrizio Romano bildirib ki, Alvarez bu gün İstanbula gələrək tibbi müayinədən keçəcək.
Vest Hem cəmi iki il əvvəl onun transferinə 35 milyon funt sterlinq (təxminən 47 milyon dollar) xərcləmişdi. Lakin yeni baş məşqçi Qrem Potterin planlarında meksikalı futbolçuya yer tapılmır.
Fənərbaxçanın baş məşqçisi Joze Mourinyo isə Alvarezi Super Liqa üçün mühüm əlavə kimi görür və onun transferində həlledici rol oynayıb.
Alvarez indiyədək Vest Hemdə 73 oyuna çıxaraq 2 qol və 3 assistlə yadda qalıb. O, əsasən dayaq yarımmüdafiəçisi kimi çıxış etsə də, mərkəz yarımmüdafiədə və bir dəfə müdafiənin mərkəzində də oynayıb.
Alvarezin gedişindən sonra Vest Hemin yay transfer pəncərəsinin 1 sentyabrda bağlanmasınadək yeni yarımmüdafiəçi axtarışına çıxacağı gözlənilir.
