BAKI, AzerVoice

İtaliyanın Yuventus klubu, İngiltərənin Çelsi komandasının türkiyəli futbolçu Kenan Yıldız üçün göndərdiyi 65 milyon avro dəyərində transfer təklifini rədd edib.

AzerVoice xəbər verir ki, Çelsi klubu 20 yaşlı oyunçunu heyətinə cəlb etmək üçün İtaliya təmsilçisinə 65-68 milyon avro aralığında rəsmi təklif irəli sürüb.

Lakin Turin klubu futbolçunun satılmasının müzakirə mövzusu olmadığını bildirərək danışıqları dayandırıb.

Kenan Yıldız Yuventusun baş məşqçisi İqor Tudor və klub rəhbərliyi tərəfindən yeni layihənin əsas sütunlarından biri kimi qiymətləndirilir.

O, 2023/24 mövsümündə əsas komandada debüt edib və son mövsümdə göstərdiyi performansla diqqətləri üzərinə çəkib. Gənc futbolçu ötən mövsüm ərzində 12 qol vurub, 9 məhsuldar ötürmə ilə yadda qalıb.

Klubun Yıldızla bağlı planları təkcə onu saxlamaqla məhdudlaşmır. Yuventus rəhbərliyi futbolçunun mövcud müqaviləsini 2030-cu ilə qədər uzatmaq niyyətindədir. Yeni müqavilə çərçivəsində oyunçunun illik əməkhaqqısı da 1.5 milyon avrodan 4 milyon avroya yüksəldiləcək. Bu, futbolçunun son bir il ərzində imzalayacağı ikinci müqavilə yenilənməsi olacaq.

Yuventus bu yay transfer siyasətində bir sıra dəyişikliklərə getmək niyyətindədir. Klubun icraçı direktoru Damien Komolli yüksək maaş səbəbindən Dusan Vlahoviçi heyətdən uzaqlaşdırmaq üçün çalışır.

Serbiyalı hücumçu ilə maraqlanan əsas namizəd isə hazırda Milan klubuna rəhbərlik edən Massimiliano Alleqridir. Lakin Vlahoviçin əməkhaqqında güzəştə getmək istəməməsi bu keçidin qarşısını alır.