BAKI, AzerVoice – Azərbaycan Respublikası Mədəniyyət Nazirliyinin təşkilatçılığı ilə Bakı Ekspo Mərkəzində keçirilən XI Bakı Beynəlxalq Kitab Sərgisi çərçivəsində yazıçı və biznes mütəxəssisi Bilal Hüseynlinin “Biznesin Ruhu Satış” kitabının imza günü keçirilib. Tədbir oxucular və gənc sahibkarlar tərəfindən böyük maraqla qarşılanıb.
AzerVoice-un məlumatına kitab, əsər TeasPress nəşriyyatı tərəfindən Türkiyədə nəşr olunub və müasir biznes mühitində satışın fəlsəfəsinə, onun psixoloji və praktik tərəflərinə həsr edilib. Kitabda satışın sadəcə kommersiya fəaliyyəti deyil, həm də qarşılıqlı etimad, insan psixologiyasını anlama və dəyər yaratma prosesi olduğu vurğulanır.
İmza mərasimində iştirak edən oxucular müəlliflə söhbət imkanı qazanıb, onun biznes sahəsindəki təcrübəsi və motivasiya dolu çıxışlarından faydalanıblar. Bilal Hüseynli tədbirdə çıxışı zamanı kitabın yazılma məqsədini açıqlayaraq bildirib ki, məqsədi gənc sahibkarlar və satış mütəxəssislərinə praktiki biliklər qazandırmaq, eyni zamanda iş dünyasında motivasiya qaynağı olmaqdır:
“Satış yalnız bir məhsulu təqdim etmək deyil, qarşı tərəfin ehtiyaclarını anlamaq, onlara dəyər qatmaq və uzunmüddətli etimad münasibəti qurmaqdır”, – deyə o vurğulayıb.
Tədbirdə həmçinin kitabın Azərbaycan biznes mühitindəki önəmi, satış vərdişlərinin inkişafında faydalı ola biləcək praktiki nümunələr və motivasiyaedici yanaşmalar müzakirə olunub. Oxucular imzalanmış kitablarla yanaşı, müəlliflə xatirə şəkilləri də çəkdiriblər.
XI Bakı Beynəlxalq Kitab Sərgisi çərçivəsində keçirilən bu görüş, gənclərin biznes sahəsinə marağını artırmaqla yanaşı, yerli müəlliflərin beynəlxalq miqyasda tanıdılması baxımından da əhəmiyyətli hesab olunur.
