BAKI, AzerVoice
Azərbaycan Respublikasının Gənclər Fondunun dəstəyi və “Gənclərin Maarifləndirilməsinə Dəstək” İctimai Birliyinin təşkilatçılığı ilə Everest zirvəsini fəth edən ilk azərbaycanlı alpinist qadın Vəfa Musayeva ilə “8.848: Bir Qadının Yolu” adlı görüş uğurla həyata keçirilib.
AzerVoice xəbər verir ki, görüş zamanı Vəfa Musayeva öz şəxsi həyat yolundan, Everest zirvəsinə aparan uzun və çətin hazırlıq prosesindən, qarşılaşdığı fiziki və psixoloji çətinliklərdən və bu zirvəyə çatmağın verdiyi hisslərdən səmimi şəkildə danışıb.
Tədbir çərçivəsində iştirakçılarla interaktiv müzakirələr aparılıb, suallar cavablandırılıb və gənclərin şəxsi inkişafı ilə bağlı motivasiyaedici çağırışlar səsləndirilib. Vəfa Musayeva xüsusilə qadınların öz güclərinə inanaraq böyük məqsədlərə çatmasının mümkünlüyünü vurğulayıb. Görüş həmçinin, qadın liderliyi, şəxsi inkişaf və iradənin rolu mövzularında maarifləndirici mesajlar verməklə yanaşı, gəncləri öz hədəfləri uğrunda mübarizəyə təşviq edib.
Məlumat üçün qeyd edək ki, “Gənclərin Maarifləndirilməsinə
Dəstək” İctimai Birliyi 30 avqust 2012-ci il tarixində Azərbaycan
Respublikasının Ədliyyə Nazirliyində dövlət qeydiyyatına alınıb və
fəaliyyətə başladığı gündən etibarən gənclərin inkişafına yönəlmiş
layihələrin təşkilində ardıcıl və fəal şəkildə iştirak edir.
Birlik, gənclərdə vətənpərvərlik duyğularının və dövlətçilik
dəyərlərinin aşılanması, onların asudə vaxtlarının faydalı və
maarifləndirici şəkildə təşkili məqsədilə gənclər siyasətinə töhfə
verən müxtəlif istiqamətli layihələr həyata keçirir.
