BAKI, AzerVoice

Qazaxıstanın Baş nazir müavini və Xarici İşlər naziri Murat Nurtleu, ölkəsinin Mərakeş şirkətləri ilə iqtisadi və investisiya əlaqələrini genişləndirmək üçün dəstək verməyə hazır olduğunu bildirib.

AzerVoice xəbər verir ki, nazir bu açıqlamanı Mərakeşin paytaxtı Rabatda keçirilən görüşlər zamanı aparıcı Mərakeş şirkətlərinin rəhbərləri ilə müzakirələr apararkən verib.

Görüşlər çərçivəsində Qazaxıstan və Mərakeş arasında müxtəlif sahələrdə əməkdaşlıq imkanları nəzərdən keçirilib.

Murat Nurtleu, Zine Capital Invest şirkətinin prezidenti Nourreddine Zine ilə kənd təsərrüfatı, qida istehsalı və logistika sahələrində əməkdaşlıq perspektivlərini müzakirə edib. Qazaxıstanın kənd təsərrüfatı sahəsindəki təcrübəsi və istehsal imkanları nəzərə alınaraq, tərəflər qarşılıqlı ticarət və investisiya layihələrinin genişləndirilməsi barədə fikir mübadiləsi aparıblar.

Bundan əlavə, Alomra Group International şirkətinin baş icraçı direktoru Driss Benomar ilə görüş zamanı təhlükəsizlik sahəsində innovativ həllərin tətbiqi məsələləri diqqət mərkəzində olub. Hər iki tərəf texnoloji yeniliklər və təhlükəsizlik sistemlərinin təkmilləşdirilməsi istiqamətində birgə iş imkanlarını müzakirə ediblər.

Qazaxıstan tərəfi həmçinin dağ-mədən və metallurgiya sənayesi üzrə əməkdaşlığı inkişaf etdirmək üçün Cadex Group-un prezidenti Cavad Youssefi ilə görüş keçirib. Görüşdə müasir texnologiyaların tətbiqi və texniki xidmətlərin genişləndirilməsi imkanları müzakirə olunub.

Bununla yanaşı, Anfa Realities şirkətinin qurucusu Younes Essassi ilə tikinti sektorunda əməkdaşlıq perspektivləri də müzakirə edilib. İnfrastruktur layihələrinin inkişafı və böyükmiqyaslı tikinti layihələrinin həyata keçirilməsi məsələləri danışıqların əsas mövzularından olub.

Qazaxıstan və Mərakeş arasındakı bu danışıqlar iki ölkənin iqtisadi əlaqələrinin yeni mərhələyə qədəm qoyduğunu göstərir. Hər iki ölkə ticarət, investisiya və texnoloji əməkdaşlıq sahələrində strateji tərəfdaşlıq əlaqələrini möhkəmləndirmək niyyətindədir.