BAKI, AzerVoice, Nailə Babazadə

Avropa İttifaqı (Aİ) Sudanın Darfur əyalətinə həyati əhəmiyyət daşıyan humanitar yardımın çatdırılması məqsədilə təcili hava körpüsü əməliyyatına start verdiyini açıqlayıb.

AzerVoice xəbər verir ki, Aİ Komissiyasının yaydığı yazılı bəyanata görə, yardım çərçivəsində ümumilikdə 8 uçuşun həyata keçirilməsi planlaşdırılır. İlk uçuş ötən cümə günü, 12 dekabr tarixində reallaşdırılıb və Aİ-nin humanitar yardım ehtiyatlarından, eləcə də tərəfdaş təşkilatlardan təmin edilən təxminən 100 ton yardım bölgəyə çatdırılıb.

Bildirilib ki, əlavə uçuşlar bu ay ərzində və gələn ilin yanvar ayı boyunca davam edəcək. Hava körpüsü çərçivəsində sığınacaq ləvazimatları, su, sanitariya və gigiyena vasitələri, eləcə də tibbi materiallar daşınır. Əməliyyatın ümumi dəyəri Aİ-nin humanitar yardım büdcəsindən maliyyələşdirilməklə 3,5 milyon avro olaraq açıqlanıb.

Xatırladaq ki, Sudan 15 aprel 2023-cü ildən etibarən ordu ilə xarici dəstəkli Sürətli Dəstək Qüvvələri (HDQ) arasında şiddətli toqquşmaların yaşandığı ölkəyə çevrilib.

Sudanın qərbində yerləşən Darfur bölgəsinin ən böyük şəhəri olan Faşir intensiv döyüşlərdən sonra böyük ölçüdə HDQ-nin nəzarətinə keçib. On minlərlə insanın şəhəri tərk etdiyi bildirilir. Məlumatlara görə, HDQ qüvvələrinin mülki şəxsləri zorla köçürdüyü, silahsız insanları qətlə yetirdiyi və işgəncələrə məruz qoyduğu anlar təşkilat üzvlərinin paylaşdığı videolarda əks olunub.