BAKI, AzerVoice

İngiltərədə xərçəngin erkən aşkarlanması üçün 99% dəqiq qan testi sınaq mərhələsindədir.

AzerVoice xəbər verir ki, Böyük Britaniyanın Milli Səhiyyə Xidməti (NHS) xərçəngi simptomlar görünmədən əvvəl aşkarlaya bilən və 99 faiz dəqiqliyə malik qan testini klinik sınaq mərhələsinə keçirdiyini açıqlayıb.

“miONCO-Dx” adlanan bu inqilabi test cəmi 10 damcı qanla şişlərin buraxdığı genetik materialları analiz edir və xərçəngin növü ilə yanaşı, bədəndə yerləşdiyi yeri də müəyyənləşdirə bilir. Maye biopsiya texnologiyasına əsaslanan test süni intellekt alqoritmləri vasitəsilə qandakı şiş DNT-sini müəyyən edir.

Yeni mərhələdə test 8 min xəstə üzərində sınaqdan keçiriləcək. Bu test daha əvvəl 20 min insana uğurla tətbiq olunub və ağciyər, qaraciyər, bağırsaq, mədəaltı vəzi, döş və prostat xərçəngi daxil olmaqla 12-dən çox yayılmış xərçəng növünü, o cümlədən bəzi beyin şişləri və sarkomaları da erkən mərhələdə aşkar edə bilir.

Qeyd edək ki, xərçəngin erkən mərhələdə aşkarlanması müalicə imkanlarını əhəmiyyətli dərəcədə artırır və bu testin geniş tətbiqi onkoloji xəstəliklərlə mübarizədə dönüş nöqtəsi ola bilər.