BAKI,AzerVoice, Fərid Mikayılov

İran Xarici İşlər Nazirliyinin sözçüsü İsmayıl Bəqai bildirib ki, Avropa ölkələrinin nüvə məsələsindəki “məsuliyyətsiz və qeyri-konstruktiv” mövqeyi danışıqların istiqamətini dəyişib və Tehran hazırkı mərhələdə ABŞ-la danışıqlar aparmağı planlaşdırmır.

AzerVoice xəbər verir ki, Bəqai həftəlik mətbuat konfransında Böyük Britaniya, Fransa və Almaniyadan ibarət Avropa üçlüyünü (E3) nüvə razılaşması (JCPOA) ilə bağlı məsuliyyətsiz davranışda ittiham edib.

Onun sözlərinə görə, Avropa ölkələri JCPOA-nın mübahisələrin həlli mexanizmini ABŞ-ın tələblərini BMT Təhlükəsizlik Şurasına daşımaq üçün sui-istifadə ediblər.

“Onların irəli sürdüyü ilkin şərtlər əsassız və qeyri-real idi. Bu, Avropanın danışıqlardakı tərəfdaşlıq rolunu tamamilə zədələdi” – deyə Bəqai vurğulayıb.

İran rəsmisi qeyd edib ki, Tehran Beynəlxalq Atom Enerjisi Agentliyi (MAQATE) ilə təhlükəsizlik təminatları çərçivəsində konstruktiv əməkdaşlıq aparıb və bu, agentliyin razılığı ilə nəticələnib.

Lakin Avropa üçlüyü əvvəlcə bu çərçivəni dəstəkləsə də, sonradan siyasi təzyiqlərin təsiri ilə dəstəyini geri çəkib.

Bəqai vurğulayıb ki, bu addım ABŞ-ın təlimatlarına kor-koranə tabe olma və “öz maraqlarını ikinci plana keçirmə” göstəricisidir.

İran XİN sözçüsü bəyan edib ki, İran ABŞ-la birbaşa danışıqlara girməyi planlaşdırmır.

“Hazırda diplomatiya prosesi davam edir, lakin Tehran yalnız milli maraqlar və prioritetlər əsasında qərar qəbul edəcək”- deyə o bildirib.