BAKI, AzerVoice, Nailə Babazadə
İran Xarici İşlər Nazirliyi, Fars (Ərəb) körfəzində yerləşən Əbu Musa, Böyük Tonb və Kiçik Tonb adaları ilə bağlı Körfəz Əməkdaşlıq Şurası (KƏŞ) üzv ölkələrinin xarici işlər nazirlərinin birgə bəyanatına sərt reaksiya verib.
AzerVoice xəbər verir ki, bəyanatda qeyd olunub ki, “İranın bu üç ada ilə bağlı atdığı hər hansı qərar və ya addım Birləşmiş Ərəb Əmirliklərinin (BƏƏ) suverenliyini təsdiqləyən tarixi və hüquqi faktların yerini tuta bilməz”.
Tehran isə bu iddiaları “köhnəlmiş və hüquqi əsası olmayan” adlandırıb.
Xatırladaq ki, sözügedən adalar üzərində mübahisə 1971-ci ildən davam edir. Həmin il Britaniya bölgədən qoşunlarını çıxardıqdan sonra, o dövrün İran şahı Məhəmməd Rza Pəhləvi adaları qorumaq üçün donanmanı ora göndərmişdi. Hazırda adalarda İran hərbçiləri yerləşdirilib, yalnız Əbu Musa adasında isə təqribən 2 min nəfərlik mülki əhali yaşayır.
