BAKI, AzerVoice
İran İslam İnqilabı Keşikçiləri Korpusunun (SEPAH) raket birliyinin yeni komandiri general Məcid Musəvi bəyan edib ki, İsrail rəsmilərinin mümkün yeni hücumlarla bağlı verdiyi açıqlamalardan sonra İran hər cür ssenariyə hazır olmalıdır.
AzerVoice xəbər verir ki, General Musəvi bu fikirləri televiziyada çıxış etdiyi ilk rəsmi müsahibəsində səsləndirib və İran xalqının dəfələrlə ölkə və dövlətin müdafiəsində möhkəm və fədakar duruş nümayiş etdirdiyini vurğulayıb.
“Hər bir vəziyyətə hazır olmalıyıq, lakin ən vacib məsələ bu sahədəki məsuliyyətimizi düzgün dərk etməkdir.”-deyə Musəvi bildirib.
O, həmçinin İranı “yenilənmiş Kərbəla və Aşura meydanı”na bənzədərək, İsraillə qarşıdurmaların yenidən başlaya biləcəyinə işarə edib.
Qeyd edək ki, İsrail müdafiə naziri Yisrael Kats isə çərşənbə axşamı yüksək rütbəli hərbi komandirlər, o cümlədən Baş Qərargah rəisi general Eyal Zamir ilə keçirilən iclasda İran əleyhinə yeni hərbi kampaniyanın başlaya biləcəyini bildirib. Onun sözlərinə görə, məqsəd İranın nüvə və ballistik raket proqramlarını bərpa etməsinə imkan verməməkdir. Kats eyni zamanda, “Qəzza və Yəmən cəbhələrinin hələ də açıq olduğunu” və bu istiqamətlərdə sərt hücum strategiyasının davam etdiriləcəyini vurğulayıb.
Digər tərəfdən, İran ali rəhbərinin nümayəndəsi Abdullah Hacı Sadiqi bildirib ki, İsrail müharibənin ilk 48 saatında bütün məqsədlərinə çatmağa çalışsa da, uğursuz olub. O, düşmənin iqtisadi təzyiqlərlə İran xalqını ruhdan salmaq, nüvə və raket proqramlarını sıradan çıxarmaq, hətta rəhbəri hədəfə almaq planlarının puç olduğunu deyib.
İranın baş prokuroru Ğulam Hüseyn Möhsini Ejeyi isə İsrail ilə müharibənin dördüncü günü zamanı Ali Milli Təhlükəsizlik Şurasının iclasına edilən hücumla bağlı yeni detalları açıqlayıb. Onun sözlərinə görə, hücum zamanı qəfil elektrik enerjisi kəsilib və zal tam qaranlığa qərq olub.
Ejeyi əlavə edib ki, müharibə dövründə İsrail üçün casusluqda şübhəli bilinən təxminən 2000 nəfər saxlanılıb. Onların böyük hissəsi sonradan təmizlənərək sərbəst buraxılıb. Lakin İsraillə əməkdaşlıq etdiyi təsdiqlənən şəxslər hələ də həbsdə saxlanılır və istintaq davam edir.