BAKI, AzerVoice
Tesla tarixinin ən çətin dövrlərindən birini yaşayır- satışlar və mənfəət ciddi şəkildə azalıb.
AzerVoice xəbər verir ki, ABŞ-ın
elektrik avtomobil istehsalçısı Tesla 2025-ci ilin birinci rübündə
xalis mənfəətinin 71 faiz azaldığını, avtomobil satışlarının isə
ilk dəfə olaraq gerilədiyini açıqlayıb.
Şirkət bu dövrdə 409 milyon dollar mənfəət əldə etsə də, bu rəqəmin
böyük hissəsi — 595 milyon dolları — digər avtomobil
istehsalçılarına satılan ekoloji tənzimləmə kreditlərindən əldə
olunub.
Belə ki, Tesla-nın əsas bazarları olan Çin və Avropada satışlar kəskin şəkildə düşüb. Xüsusilə Çinli rəqib BYD ilə rəqabətdə üstünlüyünü itirən şirkət, bu il satış liderliyini əldən verməyə yaxınlaşır.
Avtomobil mənfəət marjası isə 2022-ci ildəki 30 faizdən bu ilin eyni dövründə 12,5 faizə düşərək 2012-ci ildən bəri ən aşağı səviyyəyə enib. Şirkətin gəlirliliyinə satış azalması ilə yanaşı, Ar-Ge xərclərinin 250 milyon dollar artması da təsir edib.
İcraçı direktor İlon Maskın bəzi siyasi bəyanatları da Teslanın marka dəyərinə mənfi təsir göstərib. Maskın ABŞ və Avropadakı sağçı siyasi dairələrə dəstək verməsi, bəzi investor və müştərilər tərəfindən narahatlıqla qarşılanır.
Mask bildirib ki, şirkət maliyyə böhranında deyil, lakin “çətinliklər mövcuddur”. O, yaxın aylarda ABŞ-da robot taksi layihəsini, eləcə də istehsalatda insanabənzər robotlardan istifadəyə keçidi elan edib.
Lakin sektordakı digər istehsalçılar — GM və Ford — bu texnologiyanın hələlik kommersiya baxımından sərfəli olmadığını əsas gətirərək bəzi layihələrini dayandırıblar.
