BAKI, AzerVoice
Mədəniyyət günləri Azərbaycan və Qırğızıstan xalqları arasında körpü rolunu oynayır.
AzerVoice xəbər verir ki, Qırğızıstanın xalq yazıçısı və dramaturqu Kayrat İmanaliyev “Kabar” agentliyinə müsahibəsində bu cür tədbirlərin xalqlar arasında dostluğu möhkəmləndirdiyini bildirib.
Kayrat İmanaliyev bildirib ki, bütün bu mədəni əlaqələr prezidentlər arasında qurulan isti münasibətlərin davamıdır.
“Mədəniyyət günləri iki ölkənin dostluğunu və humanitar əməkdaşlığını daha da dərinləşdirəcək”- deyə o vurğulayıb.
Tədbirdə Azərbaycan və Qırğızıstan mədəniyyət nazirləri görüşərək gələcək əməkdaşlıq yollarını müzakirə ediblər. Görüşdə birgə tamaşaların hazırlanması, rəssam sərgiləri və qarşılıqlı qastrollar kimi təşəbbüslər gündəmə gəlib.
Qeyd edək ki, 25 aprel tarixlərində Qırğızıstanın paytaxtı Bişkekdə Azərbaycan Mədəniyyət Günləri keçirilib. Tədbir çərçivəsində konsert proqramları, teatr tamaşaları, rəsm sərgiləri, ədəbi və mədəni tədbirlər təşkil olunub. Qırğız tamaşaçılara Azərbaycan xalqının zəngin mədəniyyəti, adət-ənənələri və incəsənəti təqdim edilib.
Mədəniyyət günləri çərçivəsində Alykul Osmonov adına Milli Kitabxanada Azərbaycan ədəbiyyatı guşəsi açılıb. Burada görkəmli Azərbaycan şairi və dramaturqu Bəxtiyar Vahabzadəyə həsr olunmuş ədəbi gecə keçirilib. Onun əsərlərinin qırğız dilinə tərcümə olunmuş variantları TÜRKSOY təşkilatı tərəfindən kitab şəklində nəşr olunub.
