BAKI, AzerVoice, Orxan Qədirzadə

İsrail ordusunun 2023-cü il oktyabrın 7-də HƏMAS-ın İsrailə qarşı həyata keçirdiyi hücumdan bir gün əvvəl əldə edilən kəşfiyyat məlumatlarını nəzərə almadığı iddia olunur.

AzerVoice xəbər verir ki,bu barədə İsrailin dövlət yayımçısı Kan məlumat yayıb, xəbər The Times of Israel nəşrində dərc olunub.

Məlumata görə, 2023-cü il oktyabrın 6-da, Qəzza zolağı üzərində pilotsuz uçuş aparatları vasitəsilə aparılan kəşfiyyat əməliyyatı zamanı HƏMAS-ın tunel mühafizəçilərinin fəaliyyəti müşahidə edilib. İsrail tərəfi həmin tuneldə israilli girov Avera Mengistu-nun saxlanıldığını ehtimal edirdi.

Kəşfiyyat əməliyyatı zamanı əldə edilən, lakin dəqiq izah olunmayan məlumatların təhlükə siqnalı yaratdığı və bunun İsrail ordusunun Cənub Komandanlığına ötürüldüyü bildirilir. Lakin Kan-ın mənbələrinə görə, komandanlıq bu məlumatı HƏMAS-ın növbəti hücuma hazırlığı deyil, təlim fəaliyyəti kimi qiymətləndirib.

Qeyd olunur ki, oktyabrın 6-da aparıldığı iddia edilən bu əməliyyat İsrail ordusunun rəsmi qeydlərində yer almayıb və nə oktyabrın 7-də baş verən hücumla bağlı aparılan ilkin araşdırmalarda, nə də sonrakı təhqiqatlarda qeyd edilib. Məlumatın niyə sənədləşdirilmədiyi hələlik açıqlanmır.

Kan bu kəşfiyyat fəaliyyəti barədə ilk dəfə ayın əvvəlində məlumat vermişdi. Həmin vaxt yayımlanan xəbərdə əməliyyatın nə girov Mengistu ilə bağlı irəliləyişə, nə də yaxınlaşan hücumla bağlı açıq siqnala səbəb olmadığı bildirilirdi.

Məlumata görə, bu açıqlamalar İsrail ordusunun Baş Qərargah rəisi Eyal Zamirin 2018-ci ildən bəri daxil olan və HƏMAS-ın genişmiqyaslı hücum planlarını əks etdirən kəşfiyyat hesabatlarının düzgün qiymətləndirilməməsi ilə bağlı xüsusi ekspert qrupu yaratmasından təxminən iki həftə sonra səsləndirilib. Sözügedən məsələ İsrail ordusunun 7 oktyabr hadisələri ilə bağlı ilkin daxili araşdırmalarına daxil edilməmişdi.