BAKI, AzerVoice, Nailə Babazadə

Türkiyədə 2025-ci ilin avqust ayında işsizlik əvvəlki ayla müqayisədə 0,4 faiz artaraq 8,5 faizə yüksəlib.

AzerVoice xəbər verir ki, bu barədə Türkiyə Statistika Qurumu (TÜİK) məlumat verib.

Açıqlamaya əsasən, avqust ayında işsizlərin sayı 168 min nəfər artaraq 3 milyon 44 min nəfərə çatıb. İşsizlik kişilər arasında 6,8 faiz, qadınlar arasında isə 11,6 faiz olaraq qeydə alınıb.

Eyni dövrdə məşğul olan əhalinin sayı 208 min nəfər artaraq 32 milyon 829 min nəfər olub. Məşğulluq 0,3 faiz artaraq 49,4 faiz təşkil edib. Bu göstərici kişilər arasında 66,6 faiz, qadınlar arasında isə 32,6 faiz səviyyəsində olub.

Əmək bazarına daxil olanların sayı isə 376 min nəfər artaraq 35 milyon 873 min nəfərə çatıb. Əmək bazarına qoşulma faizi 54 olub. Bu göstərici kişilər arasında 71,5 faiz, qadınlar arasında isə 36,9 faiz təşkil edib.

15–24 yaş arası gənclər arasında da işsizlik artıb. Bu yaş qrupunda göstərici 0,8 faiz artaraq 16 faiz olub. Gənc kişilər arasında işsizlik 12,4 faiz, qadınlar arasında isə 22,7 faiz olaraq qeydə alınıb.