BAKI, AzerVoice, Nərmin Ağayeva

Türkiyənin Cənub-Şərqi Anadolu Bölgəsinin iqtisadi və sosial inkişafına töhfə verəcək Dörtyol-Hassa Avtomobil Yolu və Dəmir Yolu Layihəsi üçün 1,55 milyard avroluq xarici maliyyə təmin edilib.

AzerVoice xəbər verir ki, Türkiyənin Xəzinə və Maliyyə Naziri Mehmet Şimşək sosial media hesabında verdiyi açıqlamada, layihənin bölgənin rəqabət qabiliyyətini artıracağını və dəmir yolu sektoruna 2025-ci ilə qədər təmin edilən ümumi xarici maliyyənin 4,2 milyard avroya çatdığını bildirib.

Şimşək, “İskenderun körfəzini Cənub-Şərqi Anadolu və Qaziantep ilə birləşdirəcək bu layihə ilə istehsal və logistika mərkəzlərinin qlobal bazarlara çıxışı asanlaşacaq,” – deyə vurğulayıb.

Layihə üçün maliyyələşdirmə Societe Generale-nin rəhbərlik etdiyi kreditorlar konsorsiumu ilə imzalanan sazişlər çərçivəsində təmin edilib. Maliyyə İsveç İxrac Kredit Agentliyi (EKN) və İslam İnkişaf Bankının nəzdindəki İslam İnvestisiya Sığortası və İxrac Kredit Korporasiyasının (ICIEC) zəmanəti ilə müxtəlif kommersiya bankları tərəfindən dəstəklənib.

Qeyd edək ki, Nəqliyyat və İnfrastruktur Nazirliyinin İnfrastruktur İnvestisiyaları Baş İdarəsi tərəfindən həyata keçirilən Dörtyol-Hassa Layihəsi, İskenderun körfəzini Amanos dağlarının arxasındakı sənaye zonaları və Qaziantep vilayəti ilə birləşdirəcək. Layihə, həm avtomobil, həm də dəmir yolu bağlantıları ilə bölgənin nəqliyyat infrastrukturunu gücləndirəcək, ticarət, turizm və iqtisadi inkişafı dəstəkləyəcək. Xüsusilə Kahramanmaraş zəlzələlərindən zərər çəkmiş bölgənin bərpası və zəlzələyə davamlı infrastrukturun qurulması baxımından layihə böyük əhəmiyyət kəsb edir.

Layihənin tamamlanması ilə Türkiyənin ixrac potensialının artacağı, sənaye və logistika mərkəzlərinin qlobal bazarlara inteqrasiyasının sürətlənəcəyi gözlənilir. Bu, həmçinin regionun zəlzələlərə qarşı dayanıqlılığını artıracaq və sosial-iqtisadi inkişafa əhəmiyyətli töhfə verəcək.