BAKI, AzerVoice, Nərmin Ağayeva

Türkiyədə nəqliyyat inteqrasiyasını gücləndirəcək və bölgənin logistika imkanlarını artıracaq Dörtyol-Hassa Dəmir Yolu və Avtomobil Yolu Tunelləri Layihəsi üçün maliyyələşdirmə müqavilələri imzalanıb.

AzerVoice xəbər verir ki, layihə çərçivəsində Qaziantepi İskenderun Limanı ilə birləşdirəcək, hər biri 20 kilometr uzunluğunda olan və dəmir yolu ilə avtomobil yolunu birləşdirən funksional üç borulu tunel inşa ediləcək. Bu mühəndislik həlli dünyada ilk olacaq. Layihə, Amanos dağlarının altından keçərək səyahət müddətini əhəmiyyətli dərəcədə azaldacaq, bölgənin ixrac imkanlarını genişləndirəcək və iqtisadi fəallığı artıracaq.

Xəzinə və Maliyyə Nazirliyi ilə Société Générale rəhbərliyindəki kreditorlar arasında imzalanan müqavilə ilə 1,55 milyard avro məbləğində xarici maliyyə təmin edilib. Layihə Doğuş İnşaat və Eze İnşaat birgə müəssisəsi tərəfindən həyata keçiriləcək, qazıntı işlərinə isə oktyabr ayında Prezident Rəcəb Tayyib Ərdoğanın iştirakı ilə başlanacaq. Tamamlanması 2031-ci ilə planlaşdırılan layihə iki mərhələdə icra olunacaq və İskenderun-Qaziantep marşrutunu 20,6 km, Payas-Fevzipaşa dəmir yolu marşrutunu isə 29,6 km qısaldacaq.

Qeyd edək ki, layihə çərçivəsində 26 km avtomobil yolu, 23,5 km dəmir yolu, 3 tunel, 6 yeraltı keçid, 2 körpü, 2 viyadük və digər əlaqə infrastrukturları tikiləcək. Bu tunel sistemi həm Türkiyənin ən uzun funksional üç borulu tuneli, həm də dünyanın ən uzun tunel sistemi olacaq.