BAKI, AzerVoice
Argentinalı futbol ulduzu Lionel Messinin İngiltərə Premyer Liqasına keçidi hazırda real hesab edilmir.
AzerVoice xəbər verir ki, 2026-cı il Dünya Çempionatı ərəfəsində yeni klub axtarışında olduğu bildirilən ulduz futbolçunun Barselonaya dönüş ehtimalı daha yüksək qiymətləndirilir.
Messinin hazırda çıxış etdiyi İnter Mayami ilə müqaviləsindəki 12 aylıq uzatma bəndi hələ aktivləşdirilməyib. Əgər bu müddət uzadılmasa, 38 yaşlı hücumçu ilin sonunda azad agent olacaq.
Keçmiş Liverpul hücumçusu Emil Heski britaniyalı media orqanına açıqlamasında bildirib ki, Premyer Liqa klubları, xüsusilə Liverpul, Messini icarəyə götürməkdə maraqlı ola bilər. Lakin futbolçunun indiki fiziki durumu yüksək templi Premyer Liqa futboluna uyğun gəlmir.
“Messi oyun ərzində fasiləsiz hərəkətdə ola bilmir. Premyer Liqa komandalarının oyun üslubu isə bunu tələb edir”- deyə o bildirib.
Heski əlavə edib ki, Fransa və xüsusilə İspaniya Messi üçün daha uyğun mühit yarada bilər.
“Fransa liqası templi olsa da, daha yumşaqdır. Amma ən uyğun ünvan Barselonadır. Bu, həm emosional, həm də taktiki baxımdan ən təbii seçimdir”- deyə Heski qeyd edib.
Xatırladaq ki, Barselona rəhbərliyi Messi üçün qapıların hər zaman açıq olduğunu bəyan edib. Klubun yenidənqurmadan sonra Kamp Nou stadionuna qayıtmağa hazırlaşdığı bir vaxtda, Messinin də burada futbol karyerasını başa vurması ehtimalı ciddi şəkildə müzakirə olunur.
Messinin gələcəyi ilə bağlı qərarının yaxın aylarda bəlli olacağı gözlənilir. Hazırda isə futbolçunun özü hər hansı rəsmi açıqlama verməyib.