BAKI, AzerVoice

Tramp administrasiyasının işçi ixtisarları məhkəməyə daşınıb.

AzerVoice xəbər verir ki, ABŞ-da həmkarlar ittifaqları və bir sıra ştat rəhbərlikləri prezident Donald Tramp administrasiyasına qarşı federal işçilərin ixtisarına görə məhkəmə iddiası qaldırıblar.

Onlar bu addımın konstitusiyanın “güclər bölünməsi” prinsipini pozduğunu bildiriblər.

Washington Postun məlumatına görə, Hökumətin Səmərəliliyi Departamenti (DOGE) tərəfindən həyata keçirilən ixtisarlar, Amerika Hökumət İşçiləri Federasiyası (AFGE), QHT-lər və bəzi yerli idarələr tərəfindən məhkəməyə verilib. AFGE-nin bəyanatında Tramp administrasiyasının Konqresin razılığı olmadan dövlət işçilərini işdən çıxarmaq hüququna malik olmadığı vurğulanıb.

Digər tərəfdən, CNN yazır ki, ABŞ-ın 12 ştatı – o cümlədən Arizona, Kolorado, Nyu-York və Oreqon – Tramp administrasiyasının tətbiq etdiyi yüksək tariflərin ləğvi üçün hüquqi prosedura başlayıb. Bu addım federal büdcə xərclərini azaltmaq məqsədilə həyata keçirilən tədbirlərə qarşı atılıb.

Qeyd edək ki, Tramp administrasiyasının maliyyə məhdudiyyətləri çərçivəsində Harvard Universitetinin də dövlət vəsaitləri dondurulub. Universitet bu qərarın qarşısını almaq üçün rəsmi şəkildə məhkəməyə müraciət edib.